УИХ-ын гишүүн Ж.Батзандангийн санаачилсан төрийн өндөр албан тушаалтнууд оффшор данстай байхыг хориглох хуулийн төслийг Төрийн байгуулалтын байнгын хорооны гишүүд дэмжсэнгүй. “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хууль”-д нэмэлт, өөрчлөлт оруулах хуулийн төсөл санаачилаад байсан юм.
    Энэ хуулийн төсөлд төрийн өндөр албан тушаалтан болон түүний гэр бүлийн нийт 2000 хүн хамрагдахаар тооцсон. Төрийн, улс төрийн, захиргааны, болон тусгай албаны удирдах албан тушаалтан албан тушаалаа гүйцэтгэх хугацаандаа болон уг албан тушаалаасаа чөлөөлөгдсөн цагаасаа хойш хоёр жилийн хугацаанд өөрийн болон эхнэр нөхөр, нэг өрхийн бүртгэл дээр хамтран амьдардаг насанд хүрээгүй хүүхэд оффшор бүсэд данс эзэмшихийг хориглоно гэсэн заалт оруулсан байсан.  Мөн Төрийн болон орон нутгийн өмчит, Төрийн болон орон нутгийн өмчийн оролцоотой компанийн  захирал, ТУЗ-ийн гишүүд гадаадад оффшор данс эзэмшиж болохгүйг тусгасан байсан юм. Гэсэн ч ийнхүү байнгын хорооны гишүүд дэмжээгүй тул уг хуулийн төсөл уналаа.

   УИХ-ын гишүүн Ж.Батзандан "Татвараас нуугдахын тулд  оффшор бүсэд данс нээсэн 10 гаруй гишүүн манай УИХ-д бий" хэмээн мэдэгдэж байсан билээ.