Хэдэн жилийн өмнө Ц.Нямдорж УИХ-аар батлагдсан хуулийг зассан нь баригдаж ихээхэн дуулианы эзэн болсон. Эцэст нь тэрээр УИХ-ын даргын өндөр сэнтийнээсээ огцорч байж дууссан юм. Харин энэ түүх давтагдаж магадгүй болов. Учир нь УИХ-ын гишүүн Д.Сарангэрэлийн тодорхойлсноор “гурван сарын” настай ирэх оны төсвийн тухай хуулинд хэн нэгэн чуулганаар батлагдсаных нь дараа “мэс ажилбар” хүргэчихжээ.

    Харин түүнийг нь МАН-ын нэгэн гярхай гишүүн илрүүлснээр хэрэг манджээ. Энэхүү дуулиан болох нь тодорхой байгаа заалт нь Төсвийн тогтвортой байдлын тухай хуулийн эцсийн найруулгад дотоодын нийт бүтээгдэхүүнд эзлэх өрийн хэмжээг 40 хувиас хэтрүүлэхгүй гэж УИХ-аар алх тогшсон тухай юм. МАН-ын гишүүд ч уг асуудлыг бүлэг дээрээ ярилцаад гар өргөжээ. Хачирхалтай нь Төсвийн тогтвортой байдлын тухай хуульд дотоодын нийт бүтээгдэхүүнд эзлэх өрийн хэмжээг 40 хувиас хэтрүүлэхгүй гэсэн заалтыг “60 хувиас хэтрүүлэхгүй” хэмээн өөрчилчихжээ. Өөрөөр хэлбэл дотоодын нийт бүтээгдэхүүнд эзлэх өрийн хэмжээг 20 хувиар нэмсэн нь нилээд том ашиг сонирхол байгаагийн илрэл. Хөөрхий Ц.Нямдорж бол маш жижиг засвараас болж өвдөг шороодсон л  доо. Түүний засварын дэргэд энэ удаагийн засвар дэндүү зоригтой, томоохон засвар юм. Бүтэн улсын дотоодын нийт бүтээгдэхүүнд эзлэх өрийг 20 хувиар нэмнэ гэдэг бол нилээд том толгой гаргаж байгаагийн илрэл шүү дээ. Бас тийм хэмжээний сонирхол эрх ашиг байгаа гэсэн үг.

    Эх сурвалжийн мэдээлж байгаагаар бол энэхүү сонирхол нь гаднаас дахин өр зээл авахад чиглэгдэж, түүнийгээ хуулиар хамгаалах гэсэн арга аж. Тэгэхээр хуулийн энэ заалтыг ашиглан гаднаас том зээл авахад зориулагдсан “мэс ажилбар” гэж тодорхойлж болох юм. МАН-ын бүлэг ирэх жил гаднаас зээл авахгүй өөрсдийн боломжоор эх орноо хөгжүүлэх гарцыг хайх хэрэгтэй гэж мэдэгдээд байгаа. Харин АН-ынхан дахин бонд гаргахыг санал болгож эхэлсэн. Энэ зөрчил дунд ирэх оны төсвийн хуульд гар хүрчээ.

    Тиймээс МАН-ын бүлэгийнхэн уг асуудлыг зүгээр өнгөрөөхгүй эзнийг нь олж хариуцлага тооцох асуудлыг хөндөх нь тодорхой боллоо. Тэдний үзэж байгаагаар бол ийм том өөрчлөлтийг зүгээр нэг УИХ-ын гишүүн, тамгын газрын ажилтан хийх боломжгүй. Тиймээс УИХ-ын дарга З.Энхболд л энэ өөрчлөлтийг хийсэн байх магадлалтай гэж хардацгааж эхэллээ.

    Тиймээс УИХ-ын дарга З.Энхболд ч энэ өөрчлөлтийн талаар байр сууриа илэрхийлэх хэрэгтэй боллоо. Саарал ордон дахь албаны хүмүүсийн яриагаар бол их хурлын тамгын газрынхан энэ өөрчлөлтөөс болж бужигнаж эхэлсэн байна.

    УИХ-ын дарга З.Энхболдыг бажигдуулж эхэлсэн өөрчлөлтийн талаар сөрөг хүчний нэр нэгтэй удирдагч Н.Энхболд "ДНБ-д эзлэх өрийн хэмжээг 40 хувиас хэтрүүлэхгүй байх хуулийн заалтыг мөрдүүлэх нь Ардын намын бүлгээс баримталсан гол байр суурь байсан. Хуулийн төслийн хэлэлцүүлгийн явцад манай намын бүлгийн байр суурь баталгаажиж, Засгийн газрын санаачилсан хуулийн төслийг буцаасан. Буруутай албан тушаалтан хариуцлага хүлээх ёстой. Хэрэв хууль засах ажлыг хэн нэгэн хүн хийсэн бол ямар хариуцлага хүлээдгийг бид бүгдээрээ мэднэ. Энэ асуудлыг тодруулж шалгах шаардлага үүслээ" гэж мэдэгдээд байна.

    МАН-ын үед хууль зассан хүн яадагийг Монголчууд бүгдээрээ мэднэ. Харин АН-ын үед хууль зассан хүнийг яадагийг Монголчууд бүгдээрээ дахин нэг харах “үзвэр”-тэй боллоо.