Засгийн газар, хотын захиргаанаас энэ жил олон шинэ ажил хийснээс хамгийн их шүүмжлэл дагуулсан нь “Азийн цагаан дагина” нэртэй хогны уут болоод байна. Улаанбаатар хотын хогийг багасгах гэсэн биш ногоон уутаар дүүргэж, гурван тэрбум төгрөгийг хог болголоо гэж шүүмжлэх хүмүүсийн тоо нэмэгдсээр.

   Нийслэлийн захиргаа үүнийг үр дүнтэй ажил, одоо дөнгөж эхлэл нь хэмээж байгаа бол УИХ-ын дарга З.Энхболд эсэргүүцэж байгаагаа мэдэгдлээ. Тэрбээр “Би хогны уутны эсрэг байгаа. Яах гэж ийм юм хийснийг мэдэхгүй. Засгийн газар, АН-ын мөрийн хөтөлбөрт мөн байсан эсэх, , уут тарааснаар хотын хогны асуудал шийдэгдэх эсэхэд эргэлзэж байна. Аудит явуулж шалгуулж байгаа” гэжээ. Авлигагүй төсөв болгоно гэж зорьж байгаа Шинэчлэлийн Засгийн газар энэ жил тендергүйгээр хоёр том хөрөнгө оруулалт хийсний нэг нь хүүхдийн дүрэмт хувцас, нөгөө нь “Азийн цагаан дагина”. Энэ уутны гурван тэрбум төгрөгийг “Об капитал” зэрэг хоёр компани хуваан авсан байдаг. Нэг ширхэгийг нь 95 төгрөгөөр үнэлсэн ч үнэндээ 100 төгрөгний шар ууттай харьцуулахад чанар муутай. Тиймээс хотын захиргаа яагаад тендер зарлахгүйгээр дээрх хоёр компанид өгсөн бэ?, Заавал ийм их хэмжээний мөнгөөр хогны уут тараах шаардлага байсан уу? Хогны уутны чанар үнэндээ тохирч байна уу? гэдгийг шалгах хэрэгтэй болжээ.

   УИХ-ын дарга З.Энхболд энэ тендерийг эсэргүүцэж, УИХ-аас ажлын хэсэг гарган шалгуулахаар болжээ. Тэгвэл саяхан болсон Ерөнхийлөгч Ц.Элбэгдоржийн “Том төрөөс ухаалаг төр рүү” чуулганаар тендергүй, үр дүн муутай, мөнгө цацсан ажлыг ихээр шүүмжилсэн юм. Ялангуяа хувиар бизнес эрхлэгчид хамгийн муу ажлуудын нэг болж байгааг дурдаж, буруутгаж байсан.

   Олон оронд уутаар хогны асуудлаа шийддэг нь үнэн. Японд гэхэд хогны уут гурван өөр өнгөтэй байдаг. Улаанд нь шатдаг материал, шард нь төмөр, цэнхэрт нь шилний хог хаягдал хийх гэх мэтээр  ангилдаг байна. Мөн иргэдэд үнэгүй тараах биш, зардаг. Гэтэл манайх ногоон уутаа үнэгүй тараагаад, айлууд нь гудамжиндаа хөглөрүүлээд байж байдаг. Уг нь Шинэчлэлийн Засгийн газар, АН-ын зорилтонд хогийг багасгах тухай орсон ч гурван тэрбум төгрөгөөр уут тараана гэж байхгүй. Тиймээс хэн, ямар зорилгоор хэврэг ногоон уутыг тендергүйгээр үйлдвэрлэв гэдгийг шалгаж байна. Шалгах ч ёстой.