УИХ-ын гишүүн Ж.Энхбаярыг Говь-Алтай аймагт хийх хөрөнгө оруулалтын мөнгийг хууль бусаар зарцуулсан гэж АТГ-аас шалгаж эхэлсэн билээ. Тэрбээр АТГ-т холбогдох бичиг баримтаа бүрдүүлж өгсөн ч долоо хоногийн өмнөөс гэр бүлийнхнийг нь өдөр бүр дуудаж, байцааж эхэлсэн байна. Үүнд Ж.Энхбаяр гишүүн бухимдаж, өчигдөр болсон нэгэн уулзалтын үеэр "Надаас асуух юмаа асууж болдоггүй юм уу. Өдөр болгон дуудаж байна. Энэ шалгалтаа хурдалж болох уу. Өөрийн зүгээс өгөх материалыг нь өгчихсөн шүү дээ. Ер нь АТГ-т итгэл алдаж байна. Бүтэн өдөржин хүлээлгэдэг, тэгснээ хуралтай байна гээд буцаадаг. Өнөө шүүмжлээд байдаг цагдаагийн арга барилаараа ажиллаж байна. АТГ-ын Н.Ганболд даргаа, шаардлагатай бол миний бүрэн эрхийг түдгэлзүүлэх хүсэлтээ өгчих л дөө. Түүнээс гадна АТГ-ын  нэр бүхий коммисаруудын нэр барьж дарамталдаг улс төрчид байна шүү" хэмээн гомдолжээ.