Өнөөдөр хэвлэлийн бага хурал хийсэн иргэн Т.Сайнжаргал, Б.Энхбаяр нар Ерөнхий сайд Н.Алтанхуягийг АТГ шалгуулахаар болжээ. Тэд түүнийг багцын мөнгөө дур мэдэн зарцуулсан гэх үндэслэлээр шалгуулж байгаа бөгөөд  дараах баримтуудаар үүнийгээ нотолж байгаа юм.

Ерөнхий сайд энэ жил 50 тэрбум төгрөгийн багцтай байснаас  өнгөрөгч зургадугаар сарын 28-ны өдөр 101 тоот захирамж гарган,  “Эх хэлний эзэд” медиа хөтөлбөрт 293,1 сая төгрөг, “Нүүдлийн зурган өгүүлэмж” байгууллагатай хамтран “Бумбардай” хүүхдэд зориулсан комикс цуврал ном бүтээхэд 255,6 сая төгрөг шилжүүлэх эрхийг Засгийн газрын хэрэг эрхлэх газрын дэд дарга Ч.Сайнбилэг, Санхүү, хөрөнгө оруулалт, үйлчилгээний хэлтсийн дарга Ж.Бямбасүрэн нарт олгосон байна. Энэхүү захирамжийг гарах үед ЗГХЭГ дээрх байгууллагуудтай ямар нэгэн гэрээ хэлцэл хийгээгүй, тендер ч зарлаагүй байхад  шууд сонгож, мөнгө шилжүүлэх эрх олгосон нь  хууль зөрчсөн үйлдэл аж. Харин гэрээ хэлцэл Ерөнхий сайдын захирамжаас долоо хоногийн дараа гарсан байна.

Түүнчлэн Төсвийн тухай хуульд зааснаар 50 сая болон түүнээс төгрөгийн үнийн дүнтэй бараа, 80 сая төгрөгөөс дээш ажил үйлчилгээнд тендер шалгаруулах ёстой байтал огт сонгон шалгаруулалтгүйгээр дээрх хоёр байгууллагыг сонгосон нь ч  өөрөө хууль бус гэж иргэд мэдэгдэж байна. Мөн гэрээнд захиалагчийг төлөөлж Ерөнхий сайдын зөвлөх Б.Ган-Очирын нэр байгаа ч өнөөг хүртэл  гарын үсэг зураагүй гэдгийг тодотгож байлаа.

Ерөнхий сайд Н.Алтанхуягийг өөрийн үзэмж тааллаар дур мэдэн, ямар нэгэн тендергүйгээр гэрээ байгуулах замаар олон зуун сая төгрөгийг дур мэдэн зарцуулсан гэсэн үндэслэлээр Авлигатай тэмцэх газарт шалгуулах хүсэлтэй байгаа гэнэ. Энэхүү хууль бус үйлдлийг нягтлан шалгахыг хүссэн хүсэлтээ тэд УИХ-ын дарга З.Энхболд, УИХ-ын Төсвийн зарлагын хяналтын дэд хороо болон Хуульзүйн сайд Х.Тэмүүжин, Монгол Улсын Ерөнхий прокурор Д.Дорлигжав нарт бас хүргүүлжээ.