Өнгөрсөн УИХ-ын сонгуулиар Увс аймгийн тойрогт МАН-аас нэр дэвшсэн Ч.Хүрэлбаатар, Б.Чойжилсүрэн нарыг мөнгө тарааж, Сонгуулийн тухай хуулийг зөрчсөн гэж шүүхээс үзсэн. Тиймээс тэднийг УИХ-ын гишүүнээс нь эргүүлэн татах үгүйг СЕХ-оор эцэслэн шийдвэрлэх юм. АН-ын зүгээс уг асуудлыг шийдвэрлэж өгөхийг хүссэн өргөдлөө СЕХ-нд өгсөн байгаа. Харин СЕХ хоёр сарын дотор асуудлыг шийдвэрлэх ёстой юм.

 Харин Увс аймгийн Тариалан сумын иргэд уг асуудлыг хурдан шийдвэрлэсэнгүй хэмээн СЕХ-нд шаардлага хүргүүлж байгаагаа мэдэгдлээ. Тэд өмнө нь Ч.Хүрэлбаатар, Б.Чойжилсүрэн нараас авсан 100 мянган төгрөгөө СЕХ-нд өгч нэг сая болгож авсан. Гэхдээ СЕХ уг асуудлыг шийдвэрлэхгүй байгаа учраас нэг сая төгрөгөө эргүүлэн өгч, тэмцэхээ мэдэгдлээ.

Тэд шаардлагадаа

Эрхэм СЕХ-ны гишүүд ээ. Монгол улсын иргэн бид "Монгол улсын сонгуулийн хууль"-ийн дагуу шударга төр засагтай, шударга гишүүдтэй болохын төлөө тэмцэл хийсэн болохоос нэг сая төгрөгийн төлөө яваагүй. Өвөг дээдсээс уламжилж ирсэн, ардчилсан төрийн буянаар өсгөж үржүүлсэн өмч болох хэдэн малын буянаар хүнийг гүтгэж луйвардахгүй амьдрах боломж бидэнд байна.

Удаа дараагийн сонгуулиар мөнгө тарааж, санал луйвардаж Увс нутгийн ард түмнийг түмэнтээ доромжилж төрийн өндөр сэнтийд суугаа Ч.Хүрэлбаатар, Б.Чойжилсүрэн нарыг өмгөөлж хамгаалаад суух ямар хүсэл эрмэлзэл та бүхэнд байгааг хэлээд өгнө үү. Төрийн өндөр албан тушаалд суудаг та бүхний ухаан малчин иргэд биднээс хавьгүй дээр баймаар юмсан. Хэрэв та бүхнийг хилсээр хардаж байгаа бол удаа дараа өгсөн хүсэлтийг шуурхай шийдвэрлэж өгнө үү.

Өнө өвлийн хүйтэнд хэдэн малаа орхиод тэмцлийнхээ эцсийн шийдвэрийг үзэж алс холоос хүрч ирээд байна. Та бүхний эцсийн шийдвэрийг гартал тэмцлийн бүхий л хэлбэрийг ашиглахаа мэдэгдье.