Увсад мөнгө тараасан гэх УИХ-ын гишүүн Б.Чойжилсүрэн, Ч.Хүрэлбаатар нарын асуудал улам хүндрэх шинжтэй байна.

 Тэднийг гишүүнээс нь эргүүлэн татах ёстой гэж АН-ынхан үзэж байгаа. Тиймээс  АН-ын Ерөнхий нарийн бичгийн дарга Ц.Оюундарь уг асуудлыг шийдвэрлэж өгөхийг хүссэн өргөдлөө СЕХ-нд өгсөн. Тэдний хэлж буйгаар тус маргааныг СЕХ эцэслэн шийдвэрлэнэ гэж хуулинд заасан байдаг аж. Үүнийг нь ч  Сонгуулийн хуулийг боловсруулан, батлалцсан УИХ-ын гишүүн Р.Бурмаагаас эхлээд олон хүмүүс баталж байгаа юм.

 СЕХ хоёр сарын дотор асуудлыг шийдвэрлэх ёстой аж. Жил тойрсон уг маргаан арай хийн намжлаа гэтэл өмнөх долоо хоногт Увс аймгийн Тариалан сумын иргэд уг асуудлыг хурдан шийдвэрлэсэнгүй хэмээн СЕХ-оос авсан нэг сая төгрөгөө буцааж өгч тэмцэхээ мэдэгдэж хэвлэлээр шуугиан тарив. Тариалан сумын иргэд уг асуудлыг түргэн шийдвэрлэж Б.Чойжилсүрэн, Ч.Хүрэлбаатар нарыг УИХ-ын гишүүнээс нь эргүүлэн татах хүртэл бид тэмцэнэ гэдгээ мэдэгдэж СЕХ-нд шаардлага хүргүүлсэн.

Энэ бүх асуудал Увсын хоёр гишүүний тэвчээрийн барсан уу, яасан тэд саяхнаас ээлжлэн хэвлэлээр бухимдалтай гэгч мэдэгдэл хийж эхэллээ. Өөрсдийг нь унагаах гэсэн АН-ын шуурхай тэмцэлд тэд ингэж хариу илгээж байна.

 Б.Чойжилсүрэн гишүүн “Би бүтэн нэг жилийн хугацаанд дуугүй явсан. Гурван ч удаагийн шүүхийн шийдвэр бидний талд гарсан. Гэтэл үүнийг үгүйсгэж, АН-ын зарим хүн ийм үйлдэл гаргаж байгаад гайхаж л сууна. Тэр ч байтугай биднийг шоронд “Хийчихсэн” сууж байлаа. Ийм үйлдлээрээ бид хоёрыг сөхрүүлнэ гэж байхгүй. Харин АН-ын нэр дэвшигчид увайгүй загнаж байна” гэж хэлсэн.

Тэгвэл Ч.Хүрэлбаатар гишүүн ч нилээн бухимдалтайгаар “Дээд шүүхийн шийдвэр бол хүчинтэй. СЕХ бол АН-ын харъяа байгууллага биш. Улс төрийн харъяалалгүйгээр асуудлыг шийдвэрлэдэг байгууллага. Бүх зүйл шийдэгдээд Б.Чойжилсүрэн бид хоёр тангарагаа өргөсөн. Тангарагаа өргөснөөс хойш энэ асуудал СЕХ-нд хамаагүй. Б.Чойжилсүрэн Ч.Хүрэлбаатар нарыг гэм буруугүй гэсэн шүүхийн шийдвэр гарсан. Ийм байхад уг асуудлыг сөхөж олон нийтэд зохион байгуулалттайгаар буруу мэдээлэл өгч байгаад харамсч байна. Бид хоёр бол тойрогтоо их ажлыг хийсэн. Улс орны хөгжилд ч хоёргүй сэтгэлээр хандаж ирсэн. Үүнийг л Увсын ард түмэн дэмжиж бид хоёрт санал өгсөн гэдэгт би огтхон ч эргэлздэггүй. Увс аймгийн иргэд хэдхэн төгрөгөнд хууртаад саналаа худалддаг хүмүүс биш. Халуунд халж, хүйтэнд нь хөрч амьдарч ирсэн хүмүүс зүгээр нэг хүний үгээр шийдвэрээ гаргачихдаггүй байх. Увсын ард түмэн бол ухаантай, хөдөлмөрч хүмүүс. Эхлээд би тоохгүй байсан. Одоо миний зэвүү хүрч байна. Арай ингэж болохгүй. Энэ хоёр суудал үнэхээр хэрэгтэй байгаа бол ард түмнийг доромжлохгүйгээр аваач. Нэг жилийн хугацаанд элдэв бусаараа дуудуулсан учраас бид хоёр дуугүй байж чадахгүй.  Тоглоом тоотой нь дээр. Увс аймагт сонгогдсон АН-ын хоёр одоо боль. Ядаж тэр С.Жавхлан шиг байл даа. Эр хүн шиг ялагдаж сур. Ард түмэн саналаа өгөөд цэг тавьсан байхад олон юм яриад байх шаардлагагүй” гэх зүйлийг дуу өндөртэйгээр хэллээ.

Ямартай ч АН-аас СЕХ-г шахаж байна. Гэхдээ СЕХ-г АН-ын талд ажиллана гэж хардах хүмүүс байна. Учир нь СЕХ-ны дарга Ч.Содномцэрэнг аль нэг улс төрийн намд харъяалагддагүй гэдэг ч 2004-2008 онд АН-ын төлөөлөн УИХ-д ажиллаж байсан. Тиймээс СЕХ-г улс төржсөн шийдвэр гаргах вий гэсэн болгоомжлол МАН-ынханд байгаа аж. Үйл явдал хэрхэн өрнөх нь энэ долоо хоногт тодорхой болно.