Бельгийн нийслэл Брюссель хотноо Дэлхийн эмэгтэй парламентчдын дээд хэмжээний уулзалтанд оролцож буй УИХ -ын гишүүн, Соёл, спорт, аялал жуулчлалын сайд Ц. Оюунгэрэл Бельгийн Фландрийн Засгийн газрын Соёлын сайд хатагтай Ёка Схаувлиге болон Валлоны Соёлын сайд хатагтай Фадила Лаанан нартай тус тус уулзаж хоёр талын харилцаа, хамтын ажиллагааны талаар болон сонирхсон бусад асуудлаар санал солилцов.

Сайд Ц.Оюунгэрэл Монголын төр, засгаас соёл, спорт, аялал жуулчлалын салбарт явуулж буй бодлого, ССАЖЯ байгуулагдсанаас хойш авч хэрэгжүүлж байгаа арга хэмжээнүүд болон үйл ажиллагааныхаа талаар товч мэдээлэл хийж, хоёр талын сонирхсон асуудлуудаар мэдээлэл, туршлагаас харилцан солилцож хамтран ажиллах хүсэлтээ илэрхийллээ.

Уулзалт ярианы үеэр талууд хоёр орны урлаг, соёлын салбарын хамтын ажиллагааг цаашид өргөжүүлэн хөгжүүлэх үүднээс соёлын биет болон биет бус өвийг хадгалан хамгаалах, сэргээн засварлах, эдгээр чиглэлээр мэргэжилтэн солилцох, бэлтгэн сургах, музей, радио, телевизийн үйл ажиллагааны эрх зүйн зохицуулалтыг сайжруулах зэрэг асуудлаар тодорхой санал, мэдээлэл, туршлагаа харилцан солилцож хамтран ажиллахаар тохиролцлоо.

Мөн сайд Ц.Оюунгэрэл Брюссель хотын Байгалийн шинжлэх ухааны музейд зочилж, эртний галавын үед амьдарч байсан амьтдын хэсэг, үзмэрийг хүүхдэд ойр байдлаар дэлгэн толилуулах туршлага болон плантеологийн лабораторитай танилцав. Энэ үеэр тус музейн үйл ажиллагаа эрхэлсэн захирал Паскал Годфруатай уулзаж,  хамтын ажиллагааны зарим асуудлаар ярилцлаа.