Өнөөдөр хуваарийн дагуу УИХ дахь намын бүлгүүд хуралдлаа. АН-ын бүлгийн хуралд Ерөнхий сайд Н.Алтанхуяг оролцож цаг үеийн асуудлаар мэдээлэл хийсэн байна. Уг хурлаар Агаарын бохирдлын тухай хуульд өөрчлөлт оруулах тухай хэлэлцсэн бөгөөд мэргэжилтнүүдийн саналыг авах ёстой гэж үзжээ. Мөн агаарын бохирдлыг бууруулах ажлыг эрчимжүүлэх ёстой гэсэн саналыг олон гишүүд хэлжээ. УИХ-аас эл хуулийг баталсан нөхцөлд агаарын бохирдолтой тэмцэх асуудал Ерөнхий сайдын мэдэлд шилжиж ирэх юм. Бүлгийн гишүүд Улаанбаатар хотын агаарын бохирдлыг бууруулахад нэн тэргүүнд хийх ажлын нэг нь нүүрсийг коксжуулж түлшинд нэвтрүүлэх нь чухал гэж үзсэн байна. Гэвч өмнөх Засгийн газрын үед Дулааны II цахилгаан станцыг түшиглэн нүүрс коксжуулах үйлдвэр байгуулахаар болж 17 тэрбум төгрөгийг шийдэж өгсөн ч энэ ажил бүтэл муутай байгаа аж. Учир нь үйлдвэрлэлд нэвтрээгүй технологиор Монголд анх удаа нүүрс коксжуулах оролдлого хийсэн нь бүтэлгүйтжээ. Хэрвээ энэ нь цаашдаа коксжуулах үйлдвэр барих боломжгүй нь нотлогдвол ажлын хариуцлага алдсан хүмүүст хариуцлага тооцох, хөрөнгийг буцаан төлүүлэх асуудал яригдана гэсэн юм.

Утааг бууруулахтай холбоотойгоор гишүүдээс гаргасан бас нэг санал нь хуучин дугуйг импортоор оруулж ирэхийг хориглох ёстой гэж үзжээ. С.Баяр Ерөнхий сайд хийж байх үед УИХ-ын гишүүн Г.Батхүү энэ асуудлыг хөндөж тавин шийдвэр гарч байсан ч өнгөрсөн хугацаанд хуучин дугуйны импортыг хориглох асуудал ажил хэрэг болоогүй аж.  Харин одоо шийдвэрийг хэрэгжүүлэх талд Засгийн газар ажиллах ёстой гэх даалгаврыг бүлгийн гишүүд гаргажээ.

Хуучин дугуй импортоор их хэмжээгээр орж ирдэг, үнэ хямдыг нь бодож монголчууд худалдан авдаг. Гэвч авто машинд хэрэглэх боломжгүй болсны дараа түлш болж хувирдаг аж. Энэ нь эргээд агаарын бохирдол бий болоход хамгийн их сөрөг нөлөө үзүүлэх болжээ. Мөн хуучин дугуй аюулгүй байдал хангаж чадахгүй байгаа. Тиймээс хуучин дугуйны импортыг хориглох нь хоёр талын чухал ач холбогдолтой аж.

Түүнчлэн агаарын бохирдлыг бууруулахад авто засварын газруудад тавих хяналт чанга байх ёстой юм байна. Шатах, тослох материалыг шатааж агаар бохирдуулдаг тул энэ чиглэлд тавих хяналтыг сайжруулах нь чухал гэж бүлгийн гишүүд үзжээ.

Мөн өнөөдрийн хурлаар Алтны худалдааны ил тод байдлыг бүрдүүлэх тухай, Ашигт малтмалын тухай хуульд нэмэлт, өөрчлөлт оруулах тухай хуулийн төслүүдийг хэлэлцээд алтанд ногдуулах татварын хэмжээг бууруулахгүй байх шийдвэрт хүрчээ. Тодруулбал, дээрх хуулийг УИХ-аас баталсан нөхцөлд алтанд ногдуулах татвар 2.5 хувь болж буурах ёстой. Мөн хуулийн үйлчлэлийн хугацаа таван жил байна гэж төсөлд заажээ.

Гэхдээ бүлгийн гишүүд “Алтанд ногдуулах татварыг 2.5 хувь болгон бууруулсан нөхцөлд хэрэгжих хугацаа нь таван жилээр хязгаарлагдаж байгаа нөхцөлд Оюутолгой төсөл дээр цааш үргэлжлэх үү, яах вэ гэх зэрэг асуудал үүсэх тул татварыг буулгахгүй байх нь зөв шийдэл болно” гэж үзэн таван хувиар тогтоох саналд нэгдсэн байна.

Ирэх пүрэв гаригт УИХ-ын чуулганы хуралдаанаар уг төслийг хэлэлцэн, хэлэлцэх эсэхийг шийднэ.

 МАХН-МҮАН-ын "Шударга ёс" эвсэл хуралдсан ч маргааш дахин үргэлжлүүлэн хуралдахаар болж, мэдээлэл хийсэнгүй.