Дархан-Уул аймгийн Ардчилсан намын даргаар ажиллаж байсан Л.Наранбаатар тэргүүтэй хүмүүс өнөөдөр мэдээлэл хийлээ. Тэд маргаашнаас эхлэн намын төв байрныхаа гадна улс төрийн суулт зарлахаар болжээ. Учир нь тэд өнгөрсөн сарын 26-нд “Шинэчлэх хөдөлгөөн” байгуулж намын дарга Н.Алтанхуяг, Ерөнхий нарийн бичгийн дарга Ц.Оюундарь нарт шаардах бичиг хүргүүлжээ. Уг шаардах бичгийн хариуг өчигдөр буюу энэ сарын 1-нд ирүүлэхийг хүссэн ч одоог хүртэл хариу нь ирээгүй аж. Тиймээс тэд улс төрийн суулт хийхээр болсон байна.

Тэд Дархан-Уул аймгийн АН-д үүсээд буй нөхцөл байдлыг шийдвэрлэхийн тулд анхан шатны үүрүүдэд намын үндсэн дүрмийн хүрээнд шударга сонгууль явуулах ёстой гэж үзэж байгаа аж.

 Цаашид Дархан-Уул аймгийн АН-ын эв нэгдлийг хангах, үйл ажиллагааг сайжруулах, Ерөнхийлөгчийн сонгуульд амжилттай оролцох зорилгоор Ерөнхий нарийн бичгийн дарга Ц.Оюундарь болон тус аймгийн АН-ын тухайн үеийн удирдлагуудын хооронд өнгөрсөн дөрөвдүгээр сард зургаан талт тохиролцоо хийгдсэн. Тус тохиролцоонд Дархан-Уул аймгийн АН-ын хороо түүний удирдлага зохион байгуулалтыг өөрчлөн хэрэгжүүлэхийг тус намын Хяналтын Ерөнхий хороо, Хэрэг Эрхлэх Газарт даалгасан. Өнгөрсөн сарын 19-ны өдөр Ерөнхий нарийн бичгийн дарга Ц.Оюундарь Дархан-Уул аймагт ажиллаж тохиролцооны талуудыг байлцуулан намын гишүүдтэй уулзаж, Хяналтын Ерөнхий хорооны шийдвэрийг хэрэгжүүлэх талаар санал солилцсон. Уг уулзалтанд 400 гаруй намын гишүүд ирж үзэл бодлоо илэрхийлсэн бөгөөд анхан шатны үүрүүдэд сонгууль явуулж, аймгийн намын хороо, түүний удирдлага зохион байгуулалтыг шинэчлэхийг олонхийн саналаар дэмжсэн юм. Хяналтын Ерөнхий хорооны шийдвэр гараад удсан ч Дархан-Уул аймгийн намын хороо, түүний удирдлага, зохион байгуулалтыг өөрчлөх талаар шийдвэртэй алхам хийгдэхгүй байгаа тул намын удирдлагууддаа шаардлага хүргүүлж байгаа нь энэ аж.

Энэ үеэр Дархан-Уул аймгийн АН-ын дарга асан Л.Наранбаатар хэлэхдээ “Дарханы Ардчилсан намд салхи оруулах цаг болсон. Энэ нам ахмад гишүүдээ харж үзэхгүй, шинэ залуу боловсон хүчнээр хүрээгээ тэлдэггүй, зөвхөн “Бурхан Халдун” группын хэдхэн ажилчны дунд л оршин тогтнож ирсэн. Үүнээс болж үе үеийн сонгуульд ялагдал хүлээсэн. Тухайлбал, Дархан-Уул аймгаас 2004 онд гурван гишүүн сонгогдож байсан бол өнөөдөр Ардчилсан засаг барьж байгаа үед нэг ч гишүүнгүй байна. Орон нутагт тэр чигтээ ялагдсан. 18 багийн Засаг дарга АН-ын нэг ч хүн байхгүй. Энэ мэтээс өмнөх удирдлагууд Дарханы АН-ыг хэрхэн удирдаж байсан нь харагдаж байгаа юм. Тиймээс өөрийн хүсэлтээр ажлаа хүлээлгээд өгөх хэрэгтэй байгаа юм. Үүнийг ч Дарханы мянга, мянган гишүүд дэмжигчид хүсч байгаа” гэсэн юм.

Мөн  тэрбээр “Н.Мөнхдаш нь намайг утсаар дарамталж, ажлаа өгөх өргөдлийг нь бичүүлсэн “ гэж хэлэн холбогдох баримтыг дэлгэсэн юм. Н.Мөнхдаш нь түүний гэр бүлийн зананхийлсэн гэж тэрбээр ярив.