Говь-Алтай аймгийн 2012 оны орон нутгийн сонгууль маргаантай болж, Монгол Улсын бүх шатны шүүхээс сонгуулийг дөрвөн сум, аймгийн төвийн нэг багт дахин явуулахаар боллоо. Тодруулбал, Говь-Алтай аймгийн сонгуулийн бүх тойрогт хувь тэнцүүлсэн хэлбэрээр, Баян-Уул, Төгрөг, Хөхморьт, Шарга сум болон аймгийн төвийн Баяншанд баг гэсэн таван тойрогт нэр дэвшигчээр, 12 суудлын төлөө хувь тэнцүүлсэн хэлбэрээр, нийтдээ 17 төлөөлөгчийг сонгох сонгуулийг дахин явуулахаар шийдвэрлэсэн. Дахин сонгууль явуулахаар болсон тул Говь-Алтай аймгийн Сонгуулийн хороог сэргээн байгуулж, 2014 оны нэгдүгээр сарын 19-нд дахин сонгуулийн санал хураахаар товложээ. Дахин сонгууль явуулахад хамгийн багадаа 164 сая төгрөг зарцуулна гэсэн тооцоо гарсан байна. МАН-ын бүлгийн зүгээс уг асуудлыг түргэн шийдвэрлэх ёстой гэсэн байр суурьтай байгаа. Энэ талаар МАН-ын зөвлөх Ш.Раднаасэдээс зарим зүйлийг тодрууллаа.

- Дээд шүүхийн шийдвэрээр бол 2012 онд байгуулагдсан ИТХ-нь ажиллах боломжтой гэж та бүхэн үзэж байгаа юм уу?

- Тийм. 18 хүний бүрэн эрх нь хүлээн зөвшөөрөгдсөн хэвээрээ байна. Гэтэл аймгийн шийдвэр гүйцэтгэлийн алба болон Засгийн газрын хэрэг эрхлэх газраас очсон бичгийн дагуу Говь-Алтай аймгийн 35 төлөөлөгчийн бүхэлд нь хүчингүй болгоод 2008-2012 оны хооронд ажиллаж байсан ИТХ-ыг ажиллуулж байна. Өөрөөр хэлбэл ажиллах хугацаа нь дууссан хүмүүс гарч ирээд аймгийн асуудлыг шийдвэрлээд явж байна. Гэтэл энэ талаар гомдол саналаа гаргая гэхэд Төрийн байгууллалтын байнгын хорооны дарга Бакей гишүүний гарын үсэгтэй бичиг очоод 2012 оны сонгуулийн үр дүнд байгуулагдсан шинэ ИТХ нь ажлаа хийх эрхзүйн чадамжтай юм шүү гэсэн. Ингээд энэ аймагт хоёр ИТХ гарч ирчихээд төсвөө хэн нь хэзээ батлах юм гэх мэт олон зөрчил үүсчихээд байна. Ер нь энэ аймагт сонгуультай холбоотой маргаан жил гаруй үргэлжиллээ. Улсын дээд шүүх дээр маргаан сөхөгдөөд явж байна. Заавал АН засагт ялах ёстой юм шиг асуудалд ханддаг шүүх нь тэр талд нь шийдвэрийг гаргах ёстой юм шиг байдлаас болж төрд итгэх итгэл нь алдагдаад байна. Шүүх байгууллагад аливаа маргааныг шийдвэрлэхдээ эрх ашиг нь хөндөгдөж байгаа этгүүдийг хуралд оролцуулж байж асуудлыг шийдвэрлэдэг. Гэтэл Говь-Алтай аймагт өөрсдийнх нь оролцуулахгүйгээр сонгуулийг хүчингүй болгосон байсан.

- Энэ нөхцөлд хууль эрх зүйн ямар зохицуулалт хийх ёстой юм бэ?

- Улсын дээд шүүхээс тодорхой этгээдэд үүрэг биелүүлэх ажлыг нь зааж өгөх ёстой. Нөгөө талаас зааж өгөөгүйгээс болж нөхцөл байдлыг хүндэрсэн байна. Иргэдийн хурал олонхи бүрдсэнээр ажиллах ёстой. Одоо байгаа нөхцөл байдалд нь 35 төлөөлөгчийн 18 буюу олонхид бүрэн эрх нь хэвээр хадгалагдаж байгаа. Энэ 18 хүн бүрэн эрхээ хэрэгжүүлээд явах ёстой.