2014 оныг босгыг алхахад сар хүрэхгүй хугацаа үлдсэн байхад сандал, суудлын асуудлаас төсвөө батлаагүй гурван аймаг байна. Үүнээс нөхцөл байдал хамгийн хурцадмал байгаа нь Дорнод аймаг. Өнөөдрийг хүртэл Засаг даргаа томилж чадаагүй тул төсвөө ч хэлэлцэхгүй өнөөдрийг хүрсэн. Харин өчигдөр ИТХ-аар төсвөө хэлэлцэх гэж байх үед нь МАН-аас аймгийн Засаг даргад нэр дэвших гэж байсан П.Мөнхтөрийг баривчилсан нь шуугиан дэгдээгээд байна. Эх сурвалжийн мэдээлснээр түүнийг авлига авсан, мөнгө угаасан байж болзошгүй гэж АТГ-аас ийнхүү саатуулсан байна.

  П.Мөнхтөр нь өмнө нь ч аймгийн ИТХ-ын төлөөлөгчөөр ажиллаж байсан бөгөөд Хятадын уул уурхайн компанид ажилладаг монголчуудын цалинг 300 мянгаас дээш байх ёстой гэсэн жишиг тогтооход багагүй үүрэг гүйцэтгэсэн нэгэн аж. Гэсэн ч түүнийг Дорнод аймгийн ганц “саалийн үнээ” “Петрочайна Дачин Тамсаг”-тай холбоотойгоор мөнгө угаадаг байсан гэх мэдээлэл тархсан байна. Учир нь тэрбээр хувийн нэгэн компанитай бөгөөд “Петрочайна Дачин Тамсаг”-ийн газрын тосыг зөөж хил гаргадаг аж. Ингэхдээ мөнгө угаасан байж болзошгүй хэмээн АТГ-ынхан үзсэн бололтой.
   Уг нь П.Мөнхтөрийг Дорнодын ИТХ-ын МАН-ын бүлгийнхэн олноороо дэмжиж байсан бөгөөд нэр дэвших боломжтой ганц хүн хэмээж байжээ. Тиймээс П.Мөнхтөрийг гэнэт ийнхүү баривчилснаас болж 2014 оны төсвийг хэлэлцэх байсан хурлаа хаяж гарцгаасан байна. Өмнө нь МАН-ын бага хурлын дараа Д.Анандбазарыг АТГ-ынхан баривчилж байсантай энэ үйл явдлыг зүйрлэн ярьж байна. Яг Засаг даргаар нэр дэвших хурлын үеэр нь баривчилсан нь цаанаа зохион байгуулалттай гэж үзэх хүн МАН-ын гишүүдийн дунд олон байгаа юм.

  Ямартаа ч улс төржсөн асуудлаас болоод Дорнодынхон төсвөө баталж чадахгүй удах бололтой. Орон нутгийн хөгжлийн бодлого, хийгдэхээр хүлээгдэж буй өч төчнөөн ажил хугацаа алдан, хүрч болох байсан үр дүнгээсээ хумслуулсаар байгаа нь дарга нарт бус ард иргэд, нутгийн хөгжилд хорлонтой тусч байгаа юм.
  Орон нутгийн хөгжил, эдийн засгийн өсөлтөнд төсөв санхүүгээс гадна хувийн хэвшлийн хөрөнгө оруулалт чухал нөлөө үзүүлдэг. 2013 оны гуравдугаар улирлын байдлаар Чойбалсан хотод 1мкв орон сууцны дундаж үнэ 1.35 сая төгрөг байгаа бөгөөд баригдаж дуусаагүй 160 айлын орон сууц байгаа юм. Дээрх орон сууцнуудыг барьж ашиглалтанд оруулах, цаашилбал барилгын салбар төдийгүй мах ноос, түгээмэл тархацтай ашигт малтмал хайн, ашиглаж барилгын материал үйлдвэрлэх чиглэлээр олон арван төслүүд хүлээлтийн байдалд орж цаг алдаж байна.