Монгол Улсын Батлан хамгаалах сайд Д.Бат-Эрдэнэ тэргүүтэй төлөөлөгчид Катар Улсын Батлан хамгаалах асуудал эрхэлсэн сайд, хошууч генерал Хамад бин Али Аль-Аттияын урилгаар 2013 оны 12 дугаар сарын 03-07-ны өдрүүдэд Катар Улсад албан ёсны айлчлал хийж байна.

Айлчлалын үеэр Батлан хамгаалахын сайд Д.Бат-Эрдэнэ  Катар Улсын Эмир Шейх Тамим Бин Хамад Аль Танид бараалхан, хоёр талын харилцаа, хамтын ажиллагаа бүх салбарт өргөжин гүнзгийрч, шинэ агуулга хэлбэрээр баяжиж байгаад сэтгэл хангалуун байгаагаа илэрхийлэн, цаашид талууд бодит үр ашиг авчрах томоохон төслүүдийг хамтран хэрэгжүүлэх замаар идэвхтэй хамтран ажиллах нь чухал ач холбогдолтой талаар харилцан санал солилцлоо. Мөн талууд хоёр орны батлан хамгаалах салбарын харилцаа нь Монгол-Катарын харилцаа, хамтын ажиллагааг хөгжүүлэхэд тэргүүлэх чиглэлийн үүрэг гүйцэтгэж байгааг  онцлон тэмдэглэв. Уулзалтын төгсгөлд Катар Улсын Эмир Шейх Тамим Бин Хамад Аль Таниг Монгол Улсад айлчлахыг урьсан Монгол Улсын Ерөнхийлөгчийн урилгыг дамжуулсныг талархан хүлээн авлаа.

Мөн Батлан хамгаалахын сайд Д.Бат-Эрдэнэ Катар Улсын Батлан хамгаалахын асуудал эрхэлсэн сайд хошууч генерал Хамад бин Али Аль-Аттияатай албан ёсны яриа, хэлэлцээ хийлээ. Хоёр улсын сайд нар яриа, хэлэлцээний үеэр дэлхий нийтийн болон бүс нутгийн аюулгүй байдал, хоёр орны батлан хамгаалах салбарын хамтын ажиллагааны өнөөгийн байдал, цаашдын төлөв, хамтран хэрэгжүүлэх арга хэмжээнүүдийн талаар харилцан ярилцаж санал солилцлоо.

Монгол Улс Катар Улстай анх 1998 оны 1 дүгээр сарын 21-ний өдөр албан ёсны дипломат харилцаа тогтоосон. 2007 оны 12 дугаар сард “Монгол Улсын Зэвсэгт хүчин, Катар Улсын Зэвсэгт хүчин хоорондын хамтын ажиллагааны гэрээ”-нд гарын үсэг зурснаар хоёр орны батлан хамгаалах салбарын харилцаа, хамтын ажиллагаа эхэлсэн. Хамтын ажиллагааны гэрээний хүрээнд хоёр орны батлан хамгаалах салбарын харилцаа цэргийн мэргэжлийн боловсон хүчин бэлтгэх, хамтарсан дадлага, сургууль хийх, энхийг дэмжих ажиллагаа, терроризмтэй тэмцэх чиглэлээр хөгжиж байна.

Катар Улстай батлан хамгаалах салбарт харилцаа, хамтын ажиллагааг гүнзгийрүүлэн хөгжүүлэх нь Монгол Улсын Үндэсний аюулгүй байдлын болон Гадаад бодлогын үзэл баримтлалд заасан “Гуравдагч хөрш”-тэй бүх талын хамтын ажиллагааг хөгжүүлэх, улс төр-дипломатын аргаар аюулгүй байдлаа хангах зорилтыг хэрэгжүүлэх, бүс нутгийн аюулгүй байдлын талаар харилцан санал, мэдээлэл солилцох механизмыг бүрдүүлэх, Mонголын цэргийн алба хаагчдыг цэргийн мэргэжлийн боловсон хүчин бэлтгэх сургалтад хамруулах, терроризмийн эсрэг тэмцэх болон энхийг сахиулах ажиллагааны чиглэлээр хамтран ажиллах, Зэвсэгт хүчний чадавхийг нэмэгдүүлэх, цэргийн алба хаагчдын нийгмийн асуудлыг шийдвэрлэх, материаллаг баазыг сайжруулахад хөрөнгө оруулалт татах, цаашид улс орны эдийн засгийг хөгжүүлэхэд шаардлагатай байгаа хөрөнгө оруулалтыг шийдвэрлэхэд нэг чухал алхам болно гэж үзэж байна.