Өчигдөр, өнөөдөр байнгын хороод хуралдах байсан ч гишүүдийн ирц бүрдээгүй учраас хойшлогдоод байна. Тодруулбал, өчигдөр Байгаль орчин, хүнс, хөдөө аж ахуйн байнгын хороо хуралдаж Агаарын тухай хуульд нэмэлт, өөрчлөлт оруулах тухай хуулийн төслийг хэлэлцэх байсан. Гэсэн ч гишүүд өөрт нь агаарын бохирдол хамаагүй юм шиг загнаж хуралдаа ирээгүй.

Харин өнөөдөр Нийгмийн бодлого, боловсрол, соёл, шинжлэх ухааны байнгын хорооны хуралдаан мөн л хойшиллоо. Хууль зүйн байнгын хорооны хуралдаан өчигдөр зургаан гишүүнтэйгээр хуралдсан ч Мөрдөх албаны тухай хуулийн төслийг хойшлуулах саналыг УИХ дахь МАН-ын бүлэг, УИХ дахь МАХН-МҮАН-ын Шударга ёс эвслийн бүлэг гаргасан учраас хэлэлцүүлэг мөн долоо хоногоор хойшлоод байна. Маргааш УИХ-ын чуулганы нэгдсэн хуралдаантай, гэвч хэлэлцэх асуудал нь ердөө Хилийн боомтын тухай хуулийн төсөл л болох нь. Тодруулбал, баасан гаригт үдээс өмнө Засгийн газрын цагаар чуулганы хуралдаан эхлээд үдээс хойшдоо хийх ажилгүй болно гэсэн үг.

Ирцийг бүрдүүлж ажиллах шаардлагыг МАН-ын зарим гишүүд байнгын хороодын дарга нарт тавьж, хэрүүл маргаандаа тулаад байгаа энэ үед УИХ-ын дарга нь юу хийгээд сууна вэ гэх шүүмжлэлийг зарим хүмүүс хэлж байна.

Энэ асуудлаар МАН-ын бүлгийн дарга Н.Энхболд “Ирц бүрдэхгүй байгаа нь дэндүү хариуцлагагүй үйлдэл. МАН-ын бүлгийн зүгээс ирцээ бүрдүүлэх шаардлагыг олонхийн бүлгэд тавьсан. Өнөөдөр нэг байнгын хорооны хуралдаанд АН-ын гишүүд байхгүйгээс хуралдаан хойшилсон. Сүүлийн үед УИХ-ын чуулганы нэгдсэн хуралдаан ирц хүрэхэд асуудалтай, заримдаа гишүүд картаа уншуулаад яваад өгдөг байдал ажиглагдаж байна. Олонхи бүх зүйл дээр хариуцлага хүлээх гээд байгаа бол тэгэх л ёстой. Ирц бүрдүүлэх асуудалд хүртэл хариуцлагатай хандах ёстой. Цөөнх бол ирц бүрдүүлдэг, тэгсэн хойноо ажлыг нь бүтээж өгдөг ийм байгууллага биш. Олонхи ирцээ бүрдүүлэхгүй бол цөөнх хуралд орохгүй байж болно. Ер нь ийм бодлогыг барина гэж бодож байгаа. Бид ард түмний сонголтоор улс төрд орж ирсэн. Тийм учраас дуртай зүйлээ хийж болно гэж үзэж байгаа бол хийх ёстой зүйлээ давхар хийгээд явах ёстой”.