АН-ын Ерөнхий нарийн бичгийн дарга Ц.Оюундарь намынхаа дэргэд Think Tank төв байгуулахаар нилээд шаргуу ажиллаж эхлэв. Уг нь өнгөрсөн УИХ-ын сонгуулийн дараа МАН-ын Ерөнхий нарийн бичгийн даргад өрсөлдсөн БО-ны сайд асан Д.Цогтбаатар намдаа Think Tank төв байгуулна гэж хэлээд буруудсан юм. Учир нь түүнийг “ямар ч утгагүй зүйл ярилаа”, “манай намд хэрэггүй”, “хүн ойлгохгүй зүйлийг хэрэгжүүлэх гэж байна”, “хэтэрхий ухаантай юм ярих шаардлагагүй” хэмээн шүүмжлээд Бага хурлынх нь гишүүдийн олонхи дэмжээгүй. Ингээд Д.Цогтбаатар Think Tank төв байгуулна гэж ярьснаасаа болж Ерөнхий нарийн бичгийн дарга болж чадалгүй Г.Занданшатарт өвдөг шороодсон юм.

    Сонирхолтой нь  МАН-ын Бага хурлын гишүүдийн хэрэггүй гэж үзсэн Think Tank төвийг АН байгуулж оновчтой шинэ санал, санаачилгуудыг ашиглахаар эрчимтэй ажиллаж байна. Ийм төв байгуулахдаа АН-ынхан Конрад Аденаур Сангийнхны зөвлөлгөөнд тулгуурлаж байгаа сураг гарлаа.

    Think Tank гэдэг нь “Шинэ санааны төв”, “Шилдэг санаачилгын цогцолбор” “Оюуны үйлдвэрлэл”, “Хөгжлийн олон гарц” гэх мэтээр ойлгогдох бөгөөд улс орны нийгэм эдийн засгийн нөхцөл байдлыг зөвөөр үнэлж дүгнэх, учирч болох үр дагаварыг урьдчилан тооцоолох сэргийлэх бодлого боловсруулдаг хүрээлэн. Ийм байгуулагын гаргасан мэдээлэлд үндэслэсэн шийдвэр бодлого хэрэгжих бололцоотой байдгаас гадна олон нийтийн дэмжлэгийг авах магадалал өндөр.

    Дэлхийн улс орнуудад Think Tank нь эрчимтэй хөгжиж байгаа бөгөөд АНУ-д сонгодог утгаараа бий болсоноос гадна Бүгд найрамдах нам, Ардчилсан намуудтай өргөн хүрээнд хамтран ажилладаг аж. Мөн Think Tank төвүүд нь Kанад, Австрали болон Европын орнуудад ч эрчимтэй хөгжиж эхэлжээ. Тиймээс жил бүр дэлхийн шилдэг Think Tank төвүүдийг шалгаруулж тэдний хийсэн бүтээл, шинэ санаачилгуудыг олон нийтэд сонордуулах болжээ.

    АН-ын дэргэдэх Think Tank төв нь намынхаа шийдвэр гаргагчидад улс орны бүхий л салбарын талаарх мэдээлэл боловсруулж өгөх, сэхээтнүүд, сэтгүүлчид, иргэний нийгмийнхнийг үйл ажиллагаандаа татан оролцуулах, ухаалаг лоббиг бүхий л хүрээнд хийх, боловсон хүчний шинэ үеийг гаргаж ирэх гэх мэт олон бодлогод чиглэгдэж байгаа аж. Ийнхүү АН-ынхан МАН-аас нэг алхамын өмнө гишгэж Think Tank-ийн төвтэй болохоор боллоо. Удахгүй энэ төвийн бүтээл, судалгаа, шинэ санаачилгууд олон нийтийн санаа бодолд хэрхэн нийцэхийг харах л үлдлээ.