Аюулгүй байдал, гадаад бодлогын болон Хууль зүйн байнгын хороодын хамтарсан хуралдаан Төрийн ордны хуралдааны “A” танхимд 9.50 цагт эхлэв. Хуралдааныг Аюулгүй байдал, гадаад бодлогын байнгын хорооны дарга Ц.Цолмон даргалав.

Аюулгүй байдал, гадаад бодлогын болон Хууль зүйн байнгын хороо 2013 оны 12 дугаар сарын 05-ны өдрийн хуралдаанаараа Монгол Улсын Их Хурлын чуулганы хуралдааны дэгийн тухай хуулийн 23 дугаар зүйлийн 23.5, 23.7-д зааснаар Хилийн боомтын тухай хуулийн төслийн заалттай бусад хуулийг нийцүүлэх үүднээс холбогдох зарим хуульд өөрчлөлт оруулах тухай хуулийн төслүүдийн анхны хэлэлцүүлгийг хийлээ.

Хилийн боомтын тухай хуулийн төсөлтэй холбогдуулан зарим хуульд өөрчлөлт оруулах тухай хуулийн төслүүдийн талаар Улсын Их Хурлын гишүүн, ажлын хэсгийн ахлагч М.Батчимэг танилцуулга хийв.

Хэлэлцэж байгаа асуудалтай холбогдуулан Улсын Их Хурлын гишүүн О.Баасанхүү, Л.Цог нар асуулт асууж Хууль зүйн сайд Х.Тэмүүжин хариулт өгөв. Мөн Улсын Их Хурлын гишүүн О.Баасанхүү “Гадаадын иргэн, харьяатын асуудал эрхэлсэн төрийн захиргааны байгууллага” гэсэн нэрийг “Иргэний харьяалал, шилжилт хөдөлгөөний асуудал эрхэлсэн төрийн захиргааны байгууллага” гэж өөрчлөгдөж байгаатай холбогдуулан үг хэлсэн.

Гадаадын иргэний эрх зүйн байдлын тухай хуульд өөрчлөлт оруулах тухай, Үндэсний аюулгүй байдлын тухай хуульд өөрчлөлт оруулах тухай, Хүн худалдаалахтай тэмцэх тухай хуульд өөрчлөлт оруулах тухай, Харьяатын тухай хуульд өөрчлөлт оруулах тухай, Монгол Улсын иргэн гадаадад хувийн хэргээр зорчих, цагаачлах тухай хуульд өөрчлөлт оруулах тухай, Ажиллах хүч гадаадад гаргах, гадаадаас ажиллах хүч, мэргэжилтэн авах тухай хуульд өөрчлөлт оруулах тухай, Хөрөнгө оруулалтын тухай хуульд өөрчлөлт оруулах тухай, Татварын ерөнхий хуульд өөрчлөлт оруулах тухай, Улсын тэмдэгтийн хураамжийн тухай хуульд өөрчлөлт оруулах тухай, Иргэний бүртгэлийн тухай хуульд өөрчлөлт оруулах тухай, Газрын тухай хуульд өөрчлөлт оруулах тухай хуулийн төслүүдийг хэлэлцүүлж батлуулах нь зүйтэй гэсэн саналыг Байнгын хороодын хуралдаанд оролцсон гишүүдийн олонх нь дэмжсэн.

Улсын Их Хурлын чуулганы нэгдсэн хуралдаанд төслүүдийг анхны хэлэлцүүлэгт бэлтгэсэн тухай санал, дүгнэлтийг УИХ-ын гишүүн М.Батчимэг хийхээр тогтов.

Хуралдаан 9.50 цагт өндөрлөв.