Ардчилал шинэчлэлт эхэлснээс хойшхи 20 гаруй жилд анх удаа төрийн томоохон алба хашиж байгаа хүн Монголын иргэн болох гэсэн, монголдоо ирж байгаа хүмүүст “хүнд сурталтай” байхаа албан ёсоор зарласан нь ихээхэн дуулиан дэгдээлээ. Сонирхолтой нь “хүнд сурталтай” байхаа зарласан дарга нь АН-ын томилсон хүн байгаа нь ихээхэн анхаарал татав. Учир нь энэ намынхан өнгөрсөн хугацаанд цаг ямагт л МАН-ынхан хүнд суртал гаргалаа гэж гомдоллож ирсэн. Гэвч МАН-аас хэн ч хүнд сурталтай байхаа ингэж улайм цайм зарлаж яваагүй. Харин ч хүнд сурталын эсрэг ажилладагаа зүйл бүрээр нотлох гэж хичээдэг байсныг олон түмэн мартаагүй.

    “Хүнд сурталтай” байхаа ил тод зарласан Гадаадын иргэн, харьяатын асуудал эрхлэх газрын дарга Б.Пүрэвдоржийн үйлдэл ард түмний дургүйг хүргээд зогсохгүй АН-д итгэх итгэлийг ч алга болголоо. Бас төрийн гурван өндөрлөгийн ч анхаарлыг татсан байна. Эх сурвалжийн мэдээлж байгаагаар бол Монгол Улсын Ерөнхийлөгч Ц.Элбэгдорж нутгийн дүү болох Б.Пүрэвдоржийг дуудаж ард түмнээсээ уучлал гуйхыг үүрэг болгосон аж. УИХ-ын дарга З.Энхболд ч АН-ын нэр хүндийг унагаж болохгүй талаар байр сууриа илэрхийлсэн байна. Харин Шинэчлэлийн Засгийн газрын тэргүүн Н.Алтанхуяг шаардлагатай гэж үзвэл хариуцлага ярихаа дуулгажээ.

    Ингээд төрийн гурван өндөрлөгөөсөө сануулга авсан Б.Пүрэвдорж “ерөнхийлөгч зөвлөсөн болохоор л ард түмнээсээ уучлал гуйж байна” гэсэн утгатай яриа өглөө. Түүнийг нь УИХ-ын дарга З.Энхболд твиттер хуудаснаа шэйрлэв. Гэвч асуудал ингээд өнгөрнө гэж худлаа болохыг өчигдөр орой саарал ордонд өрнөсөн үйл явдлууд гэрчилж байна. Учир нь МАН-ын хэдэн гишүүд Б.Пүрэвдоржийг огцруулах талаарх шаардлагыг Н.Алтанхуягт хүргэхээр ярилцсан гэнэ. Тэдэн дээр АН-ынхан ч намын нэр хүнд унагасан иймэрхүү хурган дарга нартай хариуцлага тооцох ёстой гэсэн байр сууринаас нэгдэхээр болсон сураг гарлаа.

    Төрийн ордонд ийм үйл явдал өрнөж байхтай зэрэгцэн АНУ, Их Британи, Недерланд, Швед, Унгар, Герман, Бельги, Ирланд, Kанад, Норвеги, Япон зэрэг орнуудад амьдардаг Монгол иргэд Б.Пүрэвдоржийг огцруулах шаардлагын бичгийг үйлдэж төрийн гурван өндөрлөгт илгээснээ цахим ертөнцөд нийтэллээ. Тэгээд уг албан бичгээ шууданд хийж албан ёсоор хариу хүлээхээр ярилцсан байна.
   
    Хилийн чинад дахь Монголчуудын холбоо, нэгдэлүүд өөрсдийн дэмжсэн АН-аас томилогдсон том дарга хүн “хүнд сурталтай” байхаа зарласанд итгэж ядан бичлэгийг нь дахин дахин сонсож “энэ тэгээд төрийн бодлого мөн үү, Шинэчлэлийн Засгийн газрын бодлого мөн үү” хэмээн асуухад хүргэжээ.

    Ингэснээр Ерөнхийлөгчийн “Олуулаа больё” гэсэн уриалгад сэтгэл нь уяраад эзэнт гүрнийхээ гал голомтыг тэмцэн ирэх Монгол туургатанд АН-ынхан “үгүй” хэмээн нүүр буруулах болов. Уг нь бид хилийн чиндад байгаа ахан дүүсээ, монгол туургатнуудаа “Гэдсэндээ олсон унага шиг Монголоо тээгээд ирээрэй…, Нутагтаа яарсан хүлэг шиг Монголоо тээгээд ирээрэй…, Тэнгэрээ санасан шонхор шиг Монголоо дүүлээд ирээрэй…, Гүүгээ бариад угтахаа гүрэн Монгол чинь сайн мэднэ…, Алгаа дэлгээд угтахаа ахан дүүс чинь сайн мэднэ…, Айрагаа сөгнөөд угтахаа амин Монгол чинь мэднээ…” хэмээн дуулдагсан. Харамсалтай нь олон үеийнхээ өвөг дээдсийн гал голомтыг санан санан ирэх монгол туургатанд АН-ынхан хатуурхаж “хүнд суртал” гаргахаа ил тодоор зарласан нь ихээхэн асуудал үүсгэх нь тодорхой болов.