Өргөн хэрэглээний барааны үнэ өсч буй шалтгааныг валютын ханшийн өсөлттэй холбон тайлбарлаж байна. Өнөөдөр 1740 төгрөгийн ханштай байгаа, цаашид ч нэмэгдэх хандлагатай болсон долларыг хэрхэн хязгаарлах талаар эрх баригчид ам нээхгүй байна. Удахгүй Шинэ жил, Цагаан сар гээд төсөв барсан баярууд ар араасаа цуврах нь. Тиймээс доллар хавар гэхэд 2000 төгрөг болно гэсэн таамагт итгэх хүний тоо нэмэгдсээр байна.
   Харин валютын өсөлтийн энэ шуургыг далимдуулж МАН ээлжит шоугаа хийж эхэллээ. МАН-ынхан өчигдрөөс хэвлэлээр “Бизнес эрхлэгчдээ валютын ханшны өсөлтөөс хамгаална” гэсэн сүржин өгүүлбэртэй “зарлал” тараах болжээ. Үнэхээр тэд тэнгэрт хадаад байгаа долларыг буулгаж чадах уу, гэдэгт эргэлзэх хүн байна. Өмнө нь МАН-ын Ч.Гансүх валютын ханшийг буулга гэж Төрийн ордны өмнө салаавч гаргаж байсан удаатай. Дараа нь болчимгүй үйлдэл хийсэндээ гэмшин, албан ёсоор уучлалт гуйсан. МАН-ын валютын эсрэг “операц” нэг иймэрхүү юмдаг уу даа.
  
   МАН-ынхан бизнес эрхлэгчдийг валютын өсөлтөөс хэрхэн хамгаалах нь тун эргэлзээтэй. Тэд бусдыг байтугай өөрсдийнхөө эрх ашгийг хамгаалахын тулд хэрхэж байгааг бид харж байна. Генсек Ж.Мөнхбатын хэлснээр хонины ээлжээ хүлээж буй МАН-ынхан сөрөг хүчин байх хугацаандаа Лениний музейн шүүх хуралд ялагдсан. Өвөрхангай, Увс аймгаас нэр дэвшсэн гишүүдээ ч хамгаалж чадсангүй. Увс аймгаас сонгогдсон гишүүд нь мөнгө тараасан гэдгийг шүүхээр баталсан тул ацан шалаанд байгаа. Мөн бусад намын гишүүд гурван байнгын хороонд харьяалагдаж байхад МАН-ын УИХ дахь гишүүд ганцхан байнгын хороонд орох эрхтэй хэвээр байна. Тэд Үндсэн хуулийн цэцэд хандсан ч шийдвэр эрх баригчдын талд гарлаа. Ийм байж үнэхээр бизнес эрхлэгчдийг валютын өсөлтөөс хэрхэн хамгаалах нь эргэлзээтэй.

   Уг нь сөрөг хүчин эрх баригч намаа шахаж ажилладаг. “АН валютын ханшийг буулгах ёстой” гэхийн оронд “Бид бизнес эрхлэгчдээ валютын ханшны өсөлтөөс хамгаална” гэж байгаа нь өөрсдийгөө төрийн эрхэнд байгаа гэж бодож яваа мэт харагдаж байна. Чухам энэ сурталчилгаа нь яагаад зөвхөн бизнес эрхлэгчдэд хандаад байна гэдэг бас л сонирхолтой. Валютын ханш өссөнөөр дэлгүүрийн лангуун дээрх өргөн хэрэглээний барааны үнэ огцом нэмэгдэж, иргэдийн амьдралд нөлөөлж эхэлсэн байна. Юун түрүүнд ард иргэдэд валютын ханшийн өсөлтийн эсрэг “хамгаалалт” хэрэгтэй. Харин энэ эмзэг сэдвээр МАН-ынхан хүч хүрэхгүй “шоу” хийгээд байх шиг.