УИХ-ын гишүүн Ч.Хүрэлбаатар, Б.Чойжилсүрэн нарыг огцруулахаар Увс аймгийн Тариалан сумын долоон иргэн Улаанбаатарт ирэн СЕХ-ны байрны гадна эсэргүүцлийн суулт хийгээд байгаа билээ. Тэд Увс аймгаас УИХ-д сонгогдсон хоёр гишүүнийг огцруулахыг хүссэн өргөдлөө СЕХ-нд өгсөн бөгөөд асуудлыг шийдтэл Улаанбаатараас явахгүй гэдгээ мэдэгдсэн. 

Мөн эдгээр иргэдийн эрх ашгийг хамгаалж таван төрийн бус байгууллагаас энэ сарын 4-ны өдөр СЕХ-нд шаардлага хүргүүлсэн. Тэд шаардлагынхаа хариуг дөрвөн хоногийн дотор ирүүлэхийг хүссэн ч СЕХ-оос 30 хоногийн дотор хариуг өгнө гэж мэдэгджээ. Тиймээс дээрх төрийн бус байгууллагынхан СЕХ-г хууль бус ажиллагааг таслан зогсоосонгүй гэж үзэж байгаа аж. "Сонгогчдын эрх ашгийг хамгаалах урагш дэвших холбоо", "Иргэн таны төлөө", "Иргэдийн сонголт төв", "Монголын иргэд, сонгогчдын нэгдсэн холбоо", "Монголын Ардчилсан хувьсгалыг үүсгэн байгуулагчдын анхдагчдын холбоо" зэрэг таван төрийн бус байгууллага нь цаашид одоо СЕХ-г огцорхыг шаардаж, дараагийн арга хэмжээгээ авахаа мэдэгдлээ. Мөн дээрх таван төрийн бус байгууллага дээр  таван ТББ нэмэгдэх юм байна.

Тэд хууль зөрчин сонгогчдын саналыг мөнгөөр худалдаж авсан Б.Чойжилсүрэн, Ч.Хүрэлбаатар нарыг гишүүнээс нь татан буулгах асуудлыг даруй шийдвэрлэж өгөхийг СЕХ-оос шаардаж байгаа юм.

Харин СЕХ-ны Хууль эрх зүйн хэлтсийн дарга П.Наранбат “Төрийн бус байгууллагын төлөөлүүдийн өгсөн шаардлагыг СЕХ-ны хуралдаанаар шийдвэрлэнэ. Хуулийн хугацаа буюу 30 хоногийн дотор шийдвэрлэж хариу өгнө” гэсэн тайлбарыг хэллээ.