Засгийн газрын ээлжит хуралдаан 2013 оны 12 дугаар сарын 7-ны өдөр болж, 30 шахам асуудал хэлэлцэн шийдвэрлэлээ.Засгийн газрын 2013 оны 99 дүгээр тогтоолоор баталсан "Алтанбулаг-Улаанбаатар-Замын-Үүд чиглэлийн хурдны авто зам төсөл"-ийн концессын гэрээ байгуулж, төсөл хэрэгжүүлэхэд шаардлагатай хурдны авто замын трасс, нарийвчилсан үнэлгээ, зураг төслийг батлахыг Эдийн засгийн хөгжил, Барилга хот, байгуулалт, Зам, тээвэр, Байгаль орчин, ногоон хөгжлийн сайд нарт даалгалаа. Мөн "Алтанбулаг-Улаанбаатар-Замын-Үүд чиглэлийн хурдны авто зам төсөл"-ийн авто замын трассын дагуу концесс эзэмшигчид газар олгохыг холбогдох аймаг, нийслэлийн Засаг дарга нарт үүрэг болголоо.
Концессын гэрээг "Чингис Лэнд Девелопмент групп-Шинэ хөгжлийн зам" ХХК-тай байгуулахаар тогтсон байна. Тус компани хурдны замыг барих-ашиглах-шилжүүлэх нөхцөлөөр өөрийн хөрөнгөөр барина. Авто замын барилгын ажлыг 3 жилийн дотор гүйцэтгэж, гэрээний нөхцөлийн дагуу 30 жилийн хугацаанд ашиглаад Монгол Улсад хүлээлгэж өгнө.
Концесс эзэмшигч нь гэрээ байгуулагдсанаас хойш 9 сарын хугацаанд нарийвчилсан техник, эдийн засгийн үндэслэл, зураг төслөө холбогдох яамдаар батлуулж, санхүүжилтийн гэрээ байгуулах юм. Төслийн эхний ээлжийн нэг тэрбум ам.долларын санхүүжилтийг Монгол Улсын аль нэг арилжааны банкинд байршуулах, бусад дагалдах гэрээ байгуулсны дараа концессын гэрээ хүчин төгөлдөр болох гэх мэт шаардлагыг Засгийн газар тавьж байна. Дээрх нөхцөлийг биелүүлээгүй бол гэрээ цуцална. Авто замын трассын дагуух газрыг чөлөөлж өгөх ажлыг Засгийн газар хариуцах, харин үүнтэй холбогдон гарах зардлыг концесс эзэмшигч төлөх юм. Хурдны авто замыг ашиглахдаа дотоод, гадаадын зорчигчид төлбөр төлнө. Дотоодын тээврийн хэрэгслийн зам ашигласны төлбөрийг эдийн засгийн хувьд үр ашигтай байх зарчмаар зөвшилцөж тогтооно.
