Ардчилсан хувьсгалын 24 жилийн ойн хүрээнд 12 сарын 06-10-ны өдрүүдэд намын баярын төрөл бүрийн арга хэмжээг Ардчилсан намын ХЭГ-аас зохион байгуулж байгаа билээ. Өнөөдрийн хувьд Ардчилсан намын Ахмадын цахим чуулган яг одоо Мэдэээлэл технологийн газрын Цахим хурлын танхимд болон 21 аймагт зэрэг болж байна. Ахмадын цахим чуулганд Монгол Улсын өнцөг булан бүрт байгаа 1500 ахмад оролцож байна. Ардчиллын үйл хэргийн төлөө хоёргүй сэтгэлээр зүтгэж ирсэн үе үеийн ахмад буурлууддаа АН-ын дарга Монгол Улсын Ерөнхий сайд Н.Алтанхуяг, Ерөнхий нарийн бичгийн дарга Ц.Оюундарь, Хүн амын хөгжил, Нийгмийн хамгааллын сайд С.Эрдэнэ нар мэндчилгээ дэвшүүллээ. Энэ үеэр АН-ын дарга Ерөнхий сайд Н.Алтанхуяг "Ахмад буурлууддаа зориулсан оновчтой бодлого хэрэгжүүлнэ" гэж хэлээд тэнд мэндчилгээ дэвшүүлэв.
 
Тэрбээр "Өнөөдрийн шинэчлэл өөрчлөлтийг авч ирэх 24 жилийн хугацаанд Ардчилсан намын тулах цэг, түших багана байж ирсэн ахмадууд та бүхэндээ Ардчилсан хувьсгалын баярын халуун мэндийг хүргэе. Иргэдээ оролцуулсан бодлоготой, авилгал хүнд сурталгүй, үйл ажиллагаагаа тайлагнадаг, хариуцлагатай, үр дүнтэй Монгол төрийг бий болгох нь Ардчилсан намын үе үеийн ахмадууд та бүхний минь зорилго байсан билээ. Энэ зорилгыг биелүүлхээр Шинэчлэлийн Засгийн газар байгуулагдан гарааны жилдээ иргэдийнхээ итгэлийг дааж амжилттай ажиллаа. Бид иргэдээ сонсдог чихтэй, иргэддээ нээлттэй ордонтой, тендэр бүхэн цахимжиж, бүтээн байгуулалт өрнөн, хүнд сурталыг цөөлж, эх орондоо үйлдвэрлэж, ажилтай чадварлаг залуусыг бэлдэж, бяцхан үрсээ тэтгэж, залуу хойчоо амьдрах ухаантай болгож эхлээд байна. Мөн мах, ногоо, нүүс, шатахуун гээд өргөн хэрэглээний бараа бүтээгдэхүүний үнийн өсөлтийг хазаарлаж чадлаа. Оншилгоо, Шинэсум, Автозам, Орон сууц, Боомтын шинэчлэл, Нисэх онгоц, Монгол зүтгүүр, Цэцэрлэгжүүлэлт, Гудамж төсөл, Монгол бахархал гээд өнгөрч буй нэг жилд хийсэн ажлуудыг тоочиж дуусахгүй.Гэхдээ эдгээр ажил маань гарааны жилд хийсэн ажил юм. Цаашид бидэнд шинэчилж, өөрчлөхөөр төлөвлөсөн олон ажил хүлээгдэж байна. Шинэчлэлийн Засгийн газар ямар улс хүлээж авсаныг ахмадууд маань сайн мэдэж байгаа. Бид эмхзамбараагүй айл, эрээвэр хураавар төрийнбүтэц, эцэс төгсгөлгүй хүнд суртал авилгал, олон арван дутуу төслүүдийг хүлээн авсан. Энэ бүгдийг ажил болгож, бүтээн байгуулалтаа улам эрчимжүүлэх болно. Өдгөө манай Засгийн газарт ахмад буурлууддаа зориулсан оновчтой халамж, хүчтэй дэмжлэг болох бодлого юу юунаас илүү хэрэгтэй байна.Бидэнд залуус хүүхдүүддээ зориулсан боловсрол, хүмүүжлийн зөв бодлогого хэрэгтэй байна. Бидэнд Монгол хүн бүрийг бүтээлч, санаачлагатай байлгах ажлын байрны бодлого хэрэгтэй байна.

Хүндэт ахмад, буурлуудаа!
Ардчилсан хувьсгалын 24 жилийн ойн баяр бол Монголын Ардчиллын төлөө зүтгэсэн үе үеийн ахмад буурлуудын маань халуун баяр юм. Ардчилсан хувьсгалын 24 жилийн ойн баяр бол Ардчилсан нам ахмадуудынхаа мөнхийн хүсэл болсон “Хүнээ хүн шиг амьдруулж, Улсаа улс шиг хөгжүүлэх” гарааны жилийн баяр юм. Ардчилсан нам, Шинэчлэлийн Засгийн газар Монголыг боогдмол, хөшүүн биш, боломжоор дүүрэн гэрэлт ирээдүйтэй орон гэдгийг батлан харуулах болно. Монгол орныг хөгжүүлэх эдгээр ажлууд бол ахмадуудаас маань бидэнд өгсөн үүрэг, ирээдүй маань биднээс нэхэх хөгжил, ард иргэдийн маань бидэнд итгэсэн итгэлийн хариу билээ. Монголын ардчиллыг нуруундаа үүрч, сэтгэлдээ тээн, үгээрээ хамгаалж, үйлсээрээ өртөөлж ирсэн бүх ахмадуудаа Ардчилсанхувьсгалын 24 жилийн ойн халуун баярын мэндийг дахин хүргэе. Бидний Монгол Үүрд мандан бадраг" гэв.