Ардчилсан хувьсгалын 24 жилийн ойн хүрээнд АН өнөөдөр ахмадуутайгаа уулзаж байна. Уг чуулга уулзалтанд АН-ын дарга Н.Алтанхуяг, Ерөнхий нарийн бичгийн дарга Ц.Оюундарь нарын хүмүүс баярын мэнд хүргэж мэндчилгээ дэвшүүллээ.  Түүний мэндчилгээг бүрэн эхээр нь хүргэе.

Идэр залуухан 24 настай Монголын Ардчиллын тулах цэг, тулгуур багана болсон эрхэм хүндэт ахмадууд та бүхэндээ Ардчилсан хувьсгалын ойн баярын халуун мэндийг хүргэе. Монгол оронд ардчиллын салхи сэвэлзсэн тэртээх он жилүүдээс өдгөөг хүртэл Ардчиллын ариун үйлсийн төлөө хувиршгүй сэтгэлээр хандаж, ялалт, ялагдлын амтыг мэдэрч ирсэн та бүхний хичээл зүтгэлийн үрээр өнөөдөр Ардчилсан нам сонгогч түмнийхээ итгэлийг хүлээж чадсан билээ.  Сонгогч олон түмэн Ардчилсан намыг сонгохдоо өнөөдрөөс илүү маргаашийн сайн сайхны төлөө, хүнд суртал авлигыг таслан зогсоохын төлөө, баялаг бүтээгчдээ дэмжсэн шударга тогтолцооны төлөө түүчээ нь байлгахыг хүссэнчлэн Ардчилсан намын гишүүн Та бид хамтдаа улс орныхоо цаашдын хувь заяаны эзэд нь болсон юм аа. Энэхүү нэр төртэй, хүндтэй үүргийг хүлээсэн Ардчилсан нам ахмадууд та бүхэнтэйгээ хамтран улс орондоо шинэчлэлийн үрийг тарих хариуцлагатай ажлыг эхлүүлээд байна. Монгол Улсын Ерөнхийлөгч, УИХ, Засгийн газрын түвшинд бодлогын уялдаа бий болгож, Ерөнхийлөгч “Шууд ардчилал, иргэний оролцоо”, УИХ “Эрх зүйн шинэчлэл”, Засгийн газар “Нийгэм эдийн засгийн шинэчлэл”-ийн зорилтыг тавин ажлаа эхлүүлж чадлаа. Эдгээр ажлыг үр дүнтэй зохион байгуулахад нийгмийн түүчээ болсон ахмадууд та бүхний оролцоо дэмжлэг, шинэчлэлийн салхийг түгээх чин сэтгэл, хүчин чармайлт хамгаас чухал юм. Ардчиллын үнэт зүйлсийг улам бүр бэхжүүлж, хүн шиг амьдарч, улс шиг хөгжихийн төлөө хийх та бидний үйл хэрэг Ардчилсан намын ялалтын тугийг ахин дахин мандуулах болно.