Ардчилсан хувьсгалын 24 жилийн ойн хүрээнд АН өнөөдөр ахмадуутайгаа уулзаж байна. Уг чуулга уулзалтанд УИХ-ын дарга З.Энхболд мэндчилгээ дэвшүүллээ.


    Цахим чуулганд оролцож байгаа Ардчилсан намын ахмад гишүүд та бүхэндээ Ардчилалын баярын өдрийн мэндчилгээ дэвшүүлье. Одоогоос 13 жилийн өмнө ардчилсан үзэлтэй 5 нам нэгдэж, Ардчилсан намыг байгуулсан билээ. Энэ өдөр бол шударга ёс, тэгш боломж, эрх чөлөө, хүний эрхийг дээдлэх, хуулийн засаглалыг тогтоох зорилгынхоо төлөө Ардчилагчид тууштай нэгдэж эв нэгдлийн эхлэлийг тавьсан өдөр юм.                   
  
    Ардчиллыг хөгжүүлж, бэхжүүлэх их үйлсэд өөрийн ажил, амьдралаа зориулж, ялж, ялагдах мөч бүрт ямагт хамт, нэг зорилго, нэгдмэл санаатай байж чадсан Ардчилсан намын ахмад үеийнхэний гавъяа түүхийн хуудсанд тод үлдсэн бөгөөд Та бүхэн хүний эрх, эрх чөлөөний дархлааг нийгэмд бий болгоход манлайлж, үлгэр дууриалал болж чадсаны үр дүнд ард түмэн Ардчилсан намд итгэл хүлээлгэж, 2012 оны Улсын Их хурлын болон орон нутгийн, 2013 оны Ерөнхийлөгчийн сонгуульд бид ОЛУУЛАА яллаа. Ялалт бол үүрэг хариуцлага юм. Монгол хүнийг эх орондоо эрх чөлөөтэй, эрүүл чийрэг, ажилтай орлоготой, аюулгүй орчинд амьдруулах “Монгол хүн 2020” хөтөлбөрийг хэрэгжүүлэхийн төлөө Улсын Их хурал, Шинэчлэлийн Засгийн газар эрчимтэй ажиллаж, хөгжлийн томоохон бүтээн байгуулалтыг эхлүүлж чадлаа. Улс орны эдийн засгийн хөгжлийг дэмжих, тогтвортой өсөлтийг хангахад чиглэсэн бодлого, шийдвэрүүдийг цаг алдалгүй батлаж гаргахын төлөө Улсын Их Хуралд суудал бүхий намууд харилцан зөвшилцөж хамтран ажиллаж байна. Улсын Их Хурлын энэ намрын ээлжит бус чуулганаар хөрөнгө оруулалтын таатай орчныг хуулиар баталгаажууллаа. Ээлжит чуулганаар 2014 оны төсвийн тухай хуулийг батлахдаа өнгөрсөн 20 гаруй жилийн хугацаанд хийж чадаагүй төсвийн зарлагын шинэчлэлийг хийж, хяналтгүй, үрэлгэн хөрөнгө оруулалтыг хумьж, түүнд шингэсэн үнэ, өртөгийн хөөсрөл, авилгыг шахаж чадлаа. Олон жил явж ирсэн хуучин зарчим өөрчлөгдсөн. Төрийн аудит хараат бусаар ажиллах эрх зүйн орчин бүрдсэн. Төсвийн шинэчлэлээр дамжуулж, “Том төрөөс ухаалаг төр рүү” шилжих ажил хэрэгжиж байна. Иргэд төрийн үйлчилгээг цахим хэлбэрээр авч, хүнд суртлаас ангижирах нөхцөл бүрдэж байна. Тэсч болох олон зардлыг хэмнэж чадсанаар цалин, тэтгэврийг нэмэх, сургууль, цэцэрлэг барих, эхчүүд, хүүхдүүд, ахмадууд, хөгжлийн бэрхшээлтэй иргэдийг дэмжих боломж бий болсон.
 
Татвар төлөгчдийн мөнгийг үр ашигтай, ил тод, хяналттай зарцуулах талаар Улсын Их хурал, Засгийн газраас хэрэгжүүлж байгаа энэ мэт олон ажлыг үр дүнд хүргэхэд Та бүхний оролцоо, хяналт, хариуцлага өндөр байх шаардлагатай байна. Иргэдээ уриалж, тунгалаг төр, ил тод төсөв, шилэн дансны зарчмыг хэрэгжүүлж, иргэдийн оролцоотой ардчилалыг шинэ шатанд гаргаж хөгжүүлэхэд Ахмадууд та нар бодит хувь нэмэр оруулж чадна гэдэгт итгэж байна.