Ардчилсан хувьсгалын 24 жилийн ойн хүрээнд АН өнөөдөр ахмадуутайгаа уулзаж байна. Уг чуулга уулзалтанд Хүн амын хөгжил, нийгмийн хамгааллын сайд С.Эрдэнэ мэндчилгээ дэвшүүллээ.

Ардчилсан хувьсгалын хүндэт партизанууд аа 

Ардчилсан нийгмийг бүтээн байгуулагчид аа!
 
Та бүхэндээ Монгол оронд ардчиллын галыг асааж ардчилсан хувьсгалын ялалтыг авч ирсэн тэртээх он жилүүдийн халуун мэндчилгээг өргөн дэвшүүлж хамгийн сайн сайхныг хүсье .

 Энэ хувьсгал бол монголчуудын зүрх сэтгэлийн дуудлага байлаа.

Энэ хувьсгал бол хуарангийн хаалттай нийгмээс соёлт хүн төрөлхтний жам ёсны замд хөтлөн оруулсан хувьсгал байлаа.
Энэ хувьсгал бол буун дуугүй, тайван замаар хийсэн хүн төрөлхтөнд үлгэр болсон хувьсгал байлаа.

Энэ хувьсгал бол Монголчуудыг их гүрний хараат байдлаас ангижруулсан хувьсгал байлаа.

Энэ хувьсгал бол монголчуудыг их хөгжилд уриалан дуудсан дуудлага байлаа.

Тэгвэл энэ хувьсгалд та бүхэн шийдвэрлэх үүрэгтэй байж, гол баатрууд нь байсныг онцлон дурсахад нэн таатай байна. Бид энэ хувьсгалын дүнд бүрэн эрхт улсаа тунхаглаж, гадаад ертөнцтэй нээлттэй харилцаж,, хүн бүр үзэл бодлоо чөлөөтэй илэрхийлэх болж нийгэм, улс төр, эдийн засаг, оюун санааны эрх чөлөөгөө бүрэн утгаар нь олж авсан юм. Энэ эрх чөлөө амар хялбар, хямдхан байгаагүй. Манай партизанууд, эрх баригчдын хүчирхийлэл, дүн өвлийн хүйтэн, хахирган хаврын хавсрагаас айж эмээхгүйгээр цуглаан жагсаал зохион байгуулах, өлсгөлөн, суулт зарлах, шахалт шаардлага үзүүлэх зэрэг олон арга хэлбэрээр цөхрөлтгүй тэмцсний дүнд хүн бүрт тэгш боломж олгож эрх чөлөөт орчинд  ажиллаж, амьдрах боломжийг бий болгосон юм.

Өнөөдөр Монгол оронд та бүхний “Хонхны дуу”-гаар эхлүүлж ард түмний төлөө бий болгосон засаглал олон түмнийхээ итгэлийг авч өөрсдийн бодлого, үйл ажиллагааг хэрэгжүүлж байгаа нь энэ тэмцэл ард иргэдийн хүсэл, зоригтой нийцэж байсны тод илэрхийлэл юмаа. Одоо бид, эрх зүйт засаглалаа улам бүр бэхжүүлэн хамгаалж, улс орноо цэцэглүүлэн хөгжүүлэх их бүтээн байгуулалтыг өрнүүлж ард иргэдээ эрүүл саруул, боловсрол мэдлэгтэй, амар тайван, элбэг хангалуун амьдрах таатай орчныг бүрдүүлэх их зорилтын өмнө ирээд байна.Энэ бүтээн байгуулалтад та бүхний мэдлэг, туршлага, ажилч хичээнгүй, тууштай чанар их чухал төдийгүй тэдгээрийг хүүхэд, залуустаа өвлүүлж, тэднийг үлгэрлэж, залж чиглүүлэх нь бид бүхний үүрэг болж байна.

Өнөөдрийн хүүхэд, залуус маань 1990 оны Монголын нийгэм, гадаад харилцааны хязгаарлагдмал байдал, нэг намын тогтолцоо, картын бараа гэж юу болох, гар утас, интернет, FM, караоке, бэлэн мөнгөний машин, кабелийн телевиз, хувийн өмч, арилжааны банк, гэж огт байгаагүй гэдгийг тэр бүр мэдэхгүй, төсөөлөх ч үгүй Иймээс та бүхнээс энэ түүхэн үнэнийг, улс орны хөгжлийн хурдацыг залуу үедээ тайлбарлан таниулах, сурган хүмүүжүүлэх, ахмад залуу үеийнхний холбоог бэхжүүлэхэд үнэтэй хувь нэмрээ оруулахыг хүсч байна. Энэ үйлсэд төр засаг дэмжлэг үзүүлж, үүрэг хүлээж оролцох болно. Монгол эх орон, монголчуудынхаа сайн сайхны төлөө залуу халуун нас, бүтээлч хөдөлмөр, боловсрол, мэдлэгээ зориулж ирсэн ахмадууд, азай буурлууддаа эрүүл энх байж, урт насалж, удаан жаргахын ерөөл өргөе.