Эгийн голийн УЦС хэзээнээсээ АН-ынхантай хамааралтай байж ирэв. Учир нь Эгийн голын УЦС-ыг “Ардчилсан холбоо эвсэл”-ийнхэн Засгийг удирдаж байхдаа барьж байгуулахаар анхны төслийг хийсэн юм. Харамсалтай нь энэхүү цахилгаан станцыг хэнээр гүйцэтгүүлэх вэ гэдгээс болж тухайн үеийн АН-ын бүлэглэлүүд хагаралдсан юм. Тухайн үед ардчилалын удирдагч С.Зориг бусдын гарт амиа алдсан. Тэрээр энэ цахилгаан станцыг хэнээр барьж байгуулах вэ? хаанаас мөнгө олох вэ? гэдэг дээр өөрийн гэсэн хатуу байр суурьтай байсан юм. Тиймээс С.Зоригийг Эгийн голын УЦС-аас болж амиа алдсан гэсэн хардлага өнөөг хүртэл байсаар ирсэн. Түүнээс хойш Эгийн голын УЦС-ийн сураг алдараад олон жилийн нүүрийг үзэв.

    Тэгвэл АН-ынхан хоёр дахь удаагаа Засгийг тэргүүлэхдээ дахин Эгийн голын УЦС-ын асуудлыг босгож ирэв. Энэ удаа тэд Эгийн голын УЦС-ыг амжилттай хэрэгжүүлнэ гэдэгтээ итгэл төгс байна. Гэхдээ л уг бүтээн байгуулалтын ажлыг хэн удирдах вэ? хөрөнгийг хаанаас олох вэ? ямар аж ахуйн нэгжээр удирдуулах вэ гэдэг дээр нэгдсэн шийдэлд хүрээгүй далдуур маргалдсаар байгаа гэнэ.

    Эцэст нь УИХ-ын гишүүн асан Д.Одхүүг томилохоор болсон байна. УИХ-ын дарга, найз З.Энхболдынхоо зөвлөхөөр ажиллаж байгаа тэрээр өмнө уулын баяжуулах Эрдэнэт үйлдвэрийн захирлаар зүтгээд чадаагүй. Ерөнхийлөгийн дэмжлэгийг авч чадаагүй гэсэн яриа гараад өнгөрсөн. Дараа нь ТӨХ-ны дарга болох гэж зүтгээд бараагүй. Сайд Х.Баттулгын мэхэнд өвдөг шороодсон. Хамгийн сүүлд Улаанбаатар төмөр замын захирал болох гээд бас л азгүйтсэн. Дахин Х.Баттулга сайдын эсэргүүцлээр хоосон хоцорсон юм. Ингээд л “нам ялаад ч хэрэг алга” хэмээх алдарт үгээ унагаж гомдоллох болсон юм.

    Олон удаагийн “ам мэх”-нд унасан түүний гомдол нилээд аюултай болж Р.Амаржаргалын хэмжээнд хүрсэн учраас ардчилагчид ярилцаж байгаад Эгийн голын УЦС-ын бүтээн байгуулалтыг удирдуулахаар тохиролцжээ. Гэвч тэрээр хүсч байсан шигээ том ажилд очоогүй учир сэтгэл дундуур хэвээрээ байгаа гэж ойрынх нь эх сурвалж мэдээллээ.

    Уг нь Эгийн голын УЦС-ыг босговол улс оронд хэрэгтэй. АН-ын нэр хүндэд ч нэмэртэй. Бас асар их хэмжээний мөнгөн дүнгээр босно. Иймэрхүү сонирхолын уулзварууд дээр Д.Одхүү чухал тоглолт үзүүлэхээр болов.

    Ийнхүү АН-ынхан удтал ярилцсан эцэст 50 сая долларын өртөгтэй Тавантолгойн цахилгаан станцыг М.Энхсайханд атгуулсан бол түүнээс дутахгүй хэмжээний төсөвтэй гэх Эгийн голын УЦС-ыг УИХ-ын гишүүн асан Д.Одхүүд хариуцууллаа.