Монгол  Улсын Ерөнхийлөгчийн санаачилгаар "Том төрөөс ухаалаг төр рүү" үндэсний чуулганыг зохион байгуулсан билээ. Дээрх санаачилгын хүрээнд Ерөнхийлөгч Ц.Элбэгдорж яг одоо УИХ-ын гишүүдтэй уулзаж байна. Тус уулзалтанд Ерөнхий сайд Н.Алтанхуяг, УИХ-ын дарга З.Энхболд мөн УИХ-ын 50 гаруй гишүүн оролцож байна. "Том төрөөс ухаалаг төр рүү" үндэсний чуулган нь Монгол Улсын ойрын ирээдүйг тодорхойлж, УИХ, Засгийн газар, Ерөнхийлөгчийн зүгээс хийх шаардлагатай зүйлсийг нэрлэж, салбар бүрээр нь хэлэлцүүлсэн .

Үүний хүрээнд УИХ дахь нам, эвслийн бүлгээс "Том төрөөс ухаалаг төр рүү" хэрхэн шилжих талаар, боловсруулах шаардлагатай хууль эрх зүйн орчин зэргийг судлах ажлын хэсгүүд байгуулагдаад байгаа юм. Монгол Улсын Ерөнхийлөгч УИХ дахь нам эвслийн бүлгийн төлөөлөл гишүүдтэй уулзаж ярилцсанаар "Том төрөөс ухаалаг төр рүү" үндэсний чуулганы үр дүнг хэрхэн хэрэгжүүлэх, цаашид ямар арга хэмжээ авах талаар зөвлөлдөх юм.

Ерөнхийлөгч Ц.Элбэгдорж уг уулзалтыг нээж хэлсэн үгэндээ "Өнөөдрийн уулзалтад хүрэлцэн ирсэн УИХ-ын дарга, Ерөнхий сайд, нийт УИХ-ын гишүүдийн энэ өдрийн амгаланг айлтгая. Өнөөдөр УИХ-ын гишүүдтэй уулзах хүсэлт УИХ дахь намын бүлгүүдэд тавьсны дагуу намууд, бие даагчдын төлөөлөл оролцож байна. Өнгөрсөн хугацаанд "Том төрөөс ухаалаг төр лүү" зөвлөгөөнтэй холбоотой. Юуны түрүүнд УИХ-ын гишүүдэд талархаж байна. Ухаалаг төр лүү шилжих талаар намын бүлгүүд ярьж, байр сууриа илэрхийлж байгаа нь сайн зүйл юм. УИХ-ын гишүүд, намын бүлгүүд авч хэлэлцсэн нь  сайн зүйл болсон. Мөн төрийн байгууллагууд, түүний нэгжүүд зөвлөгөөн дээр яригдсан зүйлсийг ярилцаж, ямар ажил хийх, яаж үйл ажиллагаага сайжруулж, төрийн үйлчилгээ иргэдэд шуурхай хүргэх талаар  ярилцаж байгаа мэдээлэл ирж байна. Бид  "Том төрөөс ухаалаг төр лүү" зөвлөгөөн хийгээд зогсохгүй тодорхой үйлдэл хийж, шийдвэр гаргаж,  шийдвэрийн гүйцэтгэлийг хэрэгжүүлэхийн тулд бүгд хамтарч ажиллахаар тохирсон байгаа. Одоо бид юу хийх вэ гэдэгтээ нэгэнт тодорхойлж чадсан учраас хийх ажил, гаргах шийдвэртээ шууд орох нь зүйтэй гэж бодож байна. Тиймээс энэ талаар УИХ-ын гишүүдтэйгээ нээлттэй ярилцая гэсэн бодлоор өнөөдрийн уулзалтыг зохион байгуулж байна.  Цаашид зөвлөгөөнд оролцсон нийгмийн бүлэг, байгууллагуудтай хамтарч ажиллах, цаашид хэрхэн ажиллах талаар Ерөнхийлөгчийн Тамгын газраас уулзалт зохион байгуулж байгаа" гэлээ.

Одоо хурал хаалттай үргэлжилж байна.