МАН-ын УИХ дахь бүлгийн дарга Н.Энхболд өнөөдөр өөрийн хүсэлтээр ажлаас чөлөөлөгдөх өргөдлөө өгсөн. Бүлгийн хурлаар ч олонхи нь дэмжин хүлээж авсан.  Түүнийг намын дарга М.Энхболдын шахалтаар бүлгийн даргын ажлаа өгсөн гэх мэдээлэл гараад байгаа.

 Харин Н.Энхболд гишүүн ямар шалтгаанаар ажлаа өгч байгаагаа тайлбарлахыг хүссэнгүй. Тэрбээр “Дараа мэдээлэл өгнө” гэдгээс өөр тайлбар хийсэнгүй.  Түүнийг ажлаа өгч байгаа талаар МАН-ын гишүүдийн хувьд ямар ч сөрөг мэдээлэл хийхгүй байгаа юм.

 УИХ-ын гишүүн Д.Оюунхорол: Өөрийн хүсэлтээр МАН-ын бүлгийн даргын ажлаас чөлөөлөгдөх хүсэлт гаргасан. Энэ асуудлыг МАН-ын Удирдах зөвлөлийн хурлаар хэлэлцэж, шийдвэрлэнэ гэж тогтсон байгаа. Удирдах зөвлөл энэ долоо хоногт хуралдаж, Н.Энхболд даргын асуудлыг шийдвэрлэнэ.

УИХ-ын гишүүн Д.Дэмбэрэл:  Н.Энхболд гишүүнийг УИХ-ын даргаас чөлөөлж байгаа. Шалтгаан нь өөрөө намын бүлгийн даргын ажлаа өгье гэсэнтэй холбоотой. "Жил гаруйн хугацаанд тэр тусмаа нилээн ээдрээтэй, хүнд хэцүү үед намын даргын албыг хашлаа. Одоо өөр хүнд энэ албаа шилжүүлж өгье" гэж хэлсэн. Тийм учраас бүлгийн даргаас чөлөөлж дараагийн хүнийг сонгох асуудалд орж байна. Н.Энхболд даргыг "муу" ажилласан гэж хэлэхгүй. Сөрөг хүчний хувьд улс орны амьдралын чухал асуудлуудыг шийдэхэд оролцож байгаа ч гэсэн шийдвэрлэх үүргийг гүйцэтгэдэггүй. Тийм учраас улс орны хэмжээнй ажлаар дүн тавихгүй. Бүлгийн дотоод арга ажиллагааны хувьд өөрөө татгалзаж байгаа бол хүсэлтийг нь хүлээж авах нь зүйтэй. Удирдлагын түвшинд энэ асуудлыг хэлэлцсэн байна лээ.

Харин МАН-ын бусад гишүүдийн хувьд уг асуудлаар байр сууриа илэрхийлэхээс татгалзлаа.