УИХ-ын гишүүн, Төрийн байгуулалтын байнгын хорооны дарга А. Бакейтай ярилцлаа.

- АН-ын бүлгийн зүгээс Р.Амаржаргал гишүүнийг УИХ-ын гишүүнээс нь чөлөөлөх талаар эсрэг байр суурьтай байгаагаа илэрхийлсэн. Энэ удаад уг асуудлаар Төрийн байгуулалтын байнгын хороо хуралдах гэж байна. Асуудлыг ямар үе шаттайгаар тавих бол?

- УИХ дахь АН-ын бүлэг Р.Амаржаргал гишүүний асуудлаар өмнө нь байр сууриа илэрхийлсэн. Энэ байр суурь нь хэвээрээ. Р. Амаржаргал гишүүн бол бие даагч гишүүн биш, сонгуульд АН-ын нэрийн өмнөөс нэр дэвшиж өрсөлдсөн. Тэгээд олон мянган сонгогчдын итгэл найдварыг хүлээж, УИХ-д сонгогдсон учраас энэ асуудлаар бүлэг өөрийн байр сууриа илэрхийлсэн. Гэхдээ хуулийн дагуу Төрийн байгуулалтын байнгын хороо Р.Амаржаргал гишүүний өргөдлийг маргаашийн хурлаар хэлэлцэж санал дүгнэлт гаргана. Цааш УИХ-ын нэгдсэн хуралдаанаар нууцаар санал хураалт явуулж шийдвэрлэнэ. Р.Амаржаргал гишүүн нь УИХ-д байх ёстой. Сонгогчдын өмнө амласан амлалтаа биелүүлэх ёстой гэсэн байр суурьтай гишүүд Р.Амаржаргал гишүүний өргөдлийг хүлээж авахгүй байх талд саналаа өгөх байх.

- Одоо Р.Амаржаргал гишүүн бүлгийн хуралдаан, байнгын хорооны хуралдаанд суухгүй байгаа. Гэтэл Р.Амаржаргал гишүүнийг хүчээр УИХ-д аваад үлдвэл цаашид үүрэгт ажлыг нь яаж хийлгэх вэ гэдэг асуулт гарч ирж байна. Үүнд ямар зохицуулалт хийх вэ?

- Ямар ч гишүүн анх сонгуульд оролцохдоо хэн нэгний албадлагаар оролцдоггүй. Өөрийнхөө сайн дураар хүсэлт тавиад оролцдог. Нэгэнт УИХ-ын гишүүнээр сонгогдсон тохиолдолд эрх гэхээсээ илүү үүргээ ухамсарлах ёстой. Олон түмний итгэл найдварыг хүлээж чадлынхаа хэрээр ажиллах ёстой. Гишүүний өргөдлийг хүлээж авахгүй гэсэн шийдвэр гарвал Р.Амаржаргал гишүүнд УИХ-ын гишүүд давхар итгэл найдвар хүлээлгэж байна гэсэн дүгнэлт гарна. Энэ тохиолдолд намын бүлэг Р.Амаржаргал гишүүнтэй ярилцаж  ажлыг нь хийлгэх асуудлыг шийдвэрлэх байх.

- Говь-Алтай аймгийн дахин сонгуулийн санхүүжилт ямар байдлаар яригдаж байгаа вэ?

- Орон нутгийн сонгууль тодорхой шалтгаанаар дахин нөхөж явах болсон. СЕХ энэ асуудлаар хуульд заасан чиг үүргийнхээ дагуу мэргэжил, арга зүйн удирдлагаар хангаж чиг үүрэг өгч ажиллах ёстой. Санхүүжилтыг орон нутаг зохицуулах боломжтой бол УИХ-аар зардлын төсвийг оруулж шийдүүлэх ёстой.