АН-ын дараагийн тоглолтын “бай” нь УИХ-ын гишүүн Л.Энх-Амгалан болов. Өмнө нь АН-ынхан Д.Арвинг урвуулж, Н.Төмөрхүү, С.Чинзориг хоёрыг эргүүлэн татуулсан. Одоо Ч.Хүрэлбаатар, Б.Чойжилсүрэн, Ё.Отгонбаяр гурвыг гөлөлзүүлж байна. Өөрөөр хэлбэл АН-ынхан сөрөг хүчний гурван суудлыг өөрийн болгож өлхөн чадсан. Одоо Увсын хоёрыг бас Булганы ганц суудлыг авах гээд янз бүрийн арга зам хайж байна. АН-ын суудлынхаа тоог нэмэх гэсэн иймэрхүү довтолгоогоо ингээд дуусахгүй гэж эх сурвалж мэдээлэв.

    Учир нь АН-ынхан УИХ-ын гишүүн Л.Энх-Амгаланг оролдох шинэ сценарийг эрт боловсруулсан байжээ. МАН-аас нэр дэвшиж сонгогдсон Л.Энх-Амгалан өмнө нь АН-д элсэж байж. Тэгсэн мөртлөө АН-аасаа гаралгүй, намын батлахаа ч буцааж тушаалгүй МАН-д орсон байна. Л.Энх-Амгалан нь цагтаа АН-ын гишүүн байгаад зогсохгүй ҮЗХ-ных нь гишүүнээр хэдэн жил ажиллаж эдийн засгийн дэмжлэг туслалцаа үзүүлж явжээ. Тэгээд нэг л өдөр нүүр буруулж МАН-ыг бараадах болсон гэнэ. Түүнийг ийм сонголт хийхэд MCS-ийн захирал Ж.Оджаргал, Л.Элдэв-Очир нар гол үүрэг гүйцэтгэсэн гэсэн хардлага байдаг аж. "МCS"-ийн дэд ерөнхийлөгч хийж байсан Л.Энх-Амгалан анхны намаасаа биш хоёр дахь намаасаа нэр дэвшиж УИХ-ын гишүүн болсон. Яг тэр үед нь АН-ынхан асуудлыг сөхөхөөр орон нутгийн намын байгууллагаасаа лавлагаа авч тохиромжтой цагийг хүлээжээ.

    Гэтэл тэдний тохиромжтой цагийг нь Л.Энх-Амгалан гишүүн гаргаж өгчээ. Учир нь тэрээр хоёрхон хоногийн өмнө цахим ертөнцөд МоАХ-ны анхдугаар чуулганы төлөөлөгчөөр ажиллаж байсан үнэмлэхээ нийтэлсэн нь АН-ынхныг хөдөлгөөнд оруулах шалтаг болжээ. Аятай цагийг отон хүлээж байсан АН-ын нарийн бичгийн дарга залуу Л.Энх-Амгалан гишүүнийг “манай намын гишүүн” гэж хэлсэн нь түүний бухимдлыг нилээд төрүүлсэн юм. Бухимдсан гишүүн “Намайг АН-ын гишүүн гэдгийг нотлох баримт, намын гишүүний үнэмлэх гаргаад ирдэг юм бол 1000 ам.доллар өгье” хэмээн мөрийцсөн юм. Хариуд нь АН-ын нарийн бичгийн дарга залуу “намын архиваа шүүж” харуулахаа амласан. Ингээд амласан ёсоор АН-ын ҮЗХ-ны гишүүнээр сонгогдож явсан тухай баримтыг гаргаж ирснээр дараагийн улс төрийг хийх бэлтгэлдээ оржээ.
    АН-ын төлөвлөж байгаагаар бол Л.Энх-Амгалан нь манай намын гишүүн байсан. Одоо болтол гишүүний батлахаа эргүүлж өгөөгүй, намаас гарах өргөдлөө ч гаргаагүй. Тиймээс хоёр намын батлахтай энэ хүнийг эргүүлэн татах асуудлыг гаргаж тавих эрх зүйн асуудлыг хуульчдаараа судлуулж эхэлсэн гэж эх сурвалж мэдээлэв. Одоогийн хуулиар АН-ын гишүүн байсан хүн нууцаар МАН-д элсээд сонгогдсон тохиолдолд шууд эргүүлэн татна гэсэн тодорхой заалт байдаггүй гэнэ. Гэхдээ л АН-ын жижигхэн асуудлыг хүртэл том болгож улс төр хийх болсон учир Л.Энх-Амгалан ч нилээд зүйлтэй нүүр туллаа. Ядаж л “урвагч” гэсэн шинж имижээс салахын аргагүй болно. Харин Л.Энх-Амгалан гишүүн “хэзээ ч АН-д элсэж байгаагүй” гэж намынхандаа тайлбарлаж эхэлжээ.

    Ийнхүү урьд өмнө тохиолдож байгаагүй нэгэн шинэ улс төрийн үйл явц өрнөх нь тодорхой боллоо. Түүний төгсөл ямар байхыг урьдчилан хэлэхэд төвөгтэй юм.