Оросын Холбооны Улсын Тооцооны танхимын дарга Т.А.Голиковагийн урилгаар А.Зангад тэргүүтэй Үндэсний аудитын газрын төлөөлөгчид ОХУ-д айлчилж байна.Ерөнхий аудитор А.Зангадыг 2013 оны 12 дугаар сарын 9-ний өдөр ОХУ-ын Тооцооны танхимын дарга Т.А.Голикова хүлээн авч уулзан, хоёр байгууллагын хамтын ажиллагааны хэтийн төлөвийн талаар ярилцав.
Мөн ОХУ-ын Тооцооны танхимын Зөвлөл болон Монгол Улсын Үндэсний аудитын газрын Ерөнхий аудиторын Удирдлагын Зөвлөлийн хамтарсан хуралдаан болж хилийн боомтуудын тохижилтын ажилд хийсэн аудитын шалгалтын үр дүнгийн талаар хэлэлцэв. Хамтарсан хуралдааны үеэр Монгол Улсын Үндэсний аудитын газар болон ОХУ-ын Тооцооны танхимын Зөвлөлийн хоорондын хамтын ажиллагааны санамж бичиг болон Монгол Улсын Үндэсний аудитын газар болон ОХУ-ын Тооцооны танхимын Зөвлөлийн хоорондын хамтын ажиллагааны гэрээнд гарын үсэг зурав.
ОХУ-ын Тооцооны танхимын дарга Т.А.Голикова Ерөнхий аудитор А.Зангадыг хүлээн авч уулзахад Монгол Улсаас ОХУ-д суугаа Элчин сайд Ш.Алтангэрэл байлцав.
Мөн үеэр А.Зангад тэргүүтэй төлөөлөгчид ОХУ-ын санхүүгийн улсын хяналтын түүхэн хөгжлийн үзэсгэлэнг үзэж сонирхов.
