Гадаад харилцааны сайд Л.Болд тэргүүтэй төлөөлөгчид Тайландын Вант Улсын нийслэл Бангкок хотноо 2013 оны 12 дугаар сарын 9-нд эхэлсэн “Авлигын эсрэг олон улсын академийг олон улсын байгууллага болгон үүсгэн байгуулах тухай хэлэлцээр”-ийн оролцогч талуудын Ассамблейн хоёрдугаар чуулганд оролцож байна.Монгол Улсын Их Хурал “Авлигын эсрэг олон улсын академийг олон улсын байгууллага болгон үүсгэн байгуулах тухай хэлэлцээр”-ийг 2012 оны 12 дугаар сарын 5-ны өдөр соёрхон баталж, 2013 оны 6 дугаар сарын 11-ний өдрөөс 39 дэх гишүүн орон нь болсон бөгөөд Авлигын эсрэг олон улсын конвенцид Монгол Улс 2006 оны 1 дүгээр сарын 11-ний өдөр нэгдэн орсон.
Тус чуулганд Гадаад харилцааны сайд Л.Болд хүндэт зочноор оролцож, нээлтийн үг хэлэв. Тэрээр хэлсэн үгэндээ Монгол Улсын Засгийн газраас авлигатай тэмцэх талаар баримталж буй бодлого, үйл ажиллагаа, туршлага, авлигаас урьдчилан сэргийлэх чиглэлд хэрэгжүүлж байгаа ажил, байр суурийг илэрхийлсэн болно. Академийн Гүйцэтгэх нарийн бичгийн дарга Мартин Кройтнертэй хоёр талын уулзалт хийж, Академийн үйл хэргийг дэмжих зарчмын байр сууриа нотолж, Монгол Улс, Академи хоорондын харилцаа, хамтын ажиллагааны ач холбогдлыг цохон тэмдэглэж, цаашид хамтран ажиллах боломж, арга замын талаар санал солилцов. Монгол Улс авлигын эсрэг тууштай ажиллаж байгааг Академийн зүгээс өндрөөр үнэлэн Хүндэтгэлийн батламжийг чуулганы үеэр гардууллаа.
Мөн сайд Л.Болд хүндэт зочноор уригдан оролцож байгаа Болгар Улсын Дэд ерөнхийлөгч Эрхэмсэг хатагтай Маргарита Попова, Марокко Улсын Төрийн засаг захиргааны асуудал эрхэлсэн сайд Мухамед Моубди нартай өөрийн хүсэлтээр тус тус уулзаж, авлигатай тэмцэж буй үйл ажиллагаа, төрийн албаны шинэчлэлийн талаар авч хэрэгжүүлж байгаа ажлын талаар харилцан туршлага солилцон ярилцав.
Түүнчлэн, Тайландын ГХЯ-ны Байнгын нарийн бичгийн дарга Сихасак Пхуангкеткеовтой уулзаж, хоёр талын харилцааны асуудал, түүний дотор 2014 онд тохиох хоёр орны хооронд дипломат харилцаа тогтоосны 40 жилийн ойг тэмдэглэн өнгөрүүлэх ажлын хүрээнд авч хэрэгжүүлэх арга хэмжээнийн талаар санал солилцов. Уулзалтын үеэр Тайландын ГХЯ-ны Байнгын нарийн бичгийн дарга Тайландын дотоод улс төрийн байдал, цаг үеийн асуудлаар мэдээлэл өгөв.
