УИХ-ын гишүүн, Ардчилсан намын бүлгийн дарга Д.Эрдэнэбат

 - УИХ-ын гишүүн Р.Амаржаргалын асуудлаар бид багагүй ярилцлаа. Би дахиад давтаж хэлье. АН төдийгүй энэ нийгэмд үнэ цэнэтэй зүйл, үнэ цэнэтэй хүн хэрэгтэй гэдгийг. Би өнөөдөр Р.Амаржаргал гишүүний хариуцлага хүлээнэ гэж хэлж байгааг хараад гайхаж байна. Хэний төлөө, яах гэж, яасан гэж хариуцлага хүлээж байгаа юм. Өнөөдрийн түүний ярьж байгаа зүйлтэй би 100 санал нэг байна. Болохгүй байгаа зүйлтэй нь. Гэхдээ одоо болохгүй байгаа зүйлүүд зөвхөн өнөөдөх үүссэн зүйл биш. Улс төр, нийгэм, эдийн засгийн тогтолцоо 10 гаруй жил явж ирсэн гаж зүйл өнөөдөр АН гарч ирсэн болохоор ил болж байна гэж би бодож байна. Нэмж хэлэхэд бид өнөөдөр юуны төлө хамт тэмцэж ирсэн юм бэ гэж  Р.Амаржаргалд хатуу хэлмээр байна. Энэ үгээ ядаж нэг удаа АН-ын бүлэг дээр орж ирээд хэлсэн бол би өөрөөр хандах байсан. Харамсалтай нь энэ үгээ хэлээгүй.     Р.Амаржаргал гэдэг хүн одоогийн нийгэмд гомдох эрх байхгүй, гутрах эрх байхгүй, харин ажлаа хийгээд явах ёстой. Тиймээс энэ үйл явдлыг Р.Амаржаргал гишүүний хариуцлагатай биш хариуцлагагүй үйлдэл гэж хэлнэ. Сая өөрөө маш хариуцлагагүй үг хэллээ. Зугтахаас өөр аргагүй боллоо гэж. Өөрчлөлтийг зугтаж биш тэмцэж хийдэг. Эцэст нь хэлэхэд АН болон АН-ыг төлөөлөн суугаа гишүүд таны хүсэлтийш хүлээж авахгүй гэж хэлье.


УИХ-ын гишүүн С.Баярцогт

- Би УИХ-ын гишүүн Р.Амаржаргалын гаргасан шийдвэрийг хувь хүн талаас нь дэмжиж байна. Хүндэтгэж байна. Би  УИХ-ын гишүүн Р.Амаржаргал хамт Засгийн газарт, УИХ-д дөрвөн ч удаа  хамт ажиллаж үзсэн. 1998 онд Р.Амаржаргал гишүүн Ерөнхий сайдад нэр дэвшээд санал тэнцчихээд байхад өөрийнхөө төлөө саналаа өгөөгүй. Тэр үед хувь хүнийх нь үүднээс ч, урстөрчийнх нь ч үүднээс ёс суртахуунтай гэж үнэлж байсан. Монголын төр болохгүй байгаа нь үнэн. Үүнийг шүүмжлээд гарах гэж байгаа нь зөв гэж бодож байна. Тиймээс Р.Амаржаргал шиг хүн яг одоо Монголын төрд, УИХ-д, улс төрд хэрэгтэй учир гишүүнээс чөлөөлгдөх хүсэлтийг нь хүлээж авахгүй гэдгээ хэлье.



УИХ-ын гишүүн Ж.Батзандан

- Энэ бол улс төрд өгч буй том сигнал. УИХ-ын гишүүн Р.Амаржаргалыг ямар нэгэн албан тушаал, ашиг сонирхлоос болж ийм шийдвэр гаргаж байна гэж бодохгүй байна. Түүнтэй санал нэг байна. Монголын төр дампуурчихаад байна. Хариулцлага ярьж чаддаггүй төр, Төрийн байгуулалтын байнгын хороотой байна. Тиймээс миний хувьд түүний гаргаж буй энэ шийдвэрийг дэмжиж байна гэдгээ илэрхийлье. УИХ-ын гишүүн Р.Амаржаргал танд амжилт хүсье.

 

УИХ-ын гишүүн Су.Батболд

- Хэрвээ шударга ёс гэж байдаг бол  УИХ-ын гишүүн Р.Амаржаргалын араас нэлээд хэдэн гишүүн гарах ёстой байх. Бид сөрөг хүчний үүднээс өнөөгийн төр болохгүй байна гэдгийг хэлдэг. Харин одоо АН-ын өөрсдийнх нь дундаас төр болохгүй байна гэдгийг Р.Амаржаргал гишүүнээр дамжуулан сонсож байна. Тиймээс эрх баригч хүчинд та нар анхаараач ээ, анзаараач ээ энэ ялалтынхаа хөөрлөөс буугаач гэж хэлмээр байна. Тэгэхгүй бол ард түмэн та нарт дүн тавина шүү.  Ингэж зориг гарган хэлж байгаа хүнийх нь хувьд түүний гаргасан шийдвэрийг дэмжинэ.
Улмаар санал хураалт явагдаж хуралдаанд оролцогч 12 гишүүний долоо нь УИХ-ын гишүүн Р.Амаржаргалын гишүүнээс чөлөөлөгдөх хүсэлтийг нь хүлээж авсангүй. Тиймээс эцсийн шийдвэрийг УИХ-ын нэгдсэн хуралдаанаар шийдвэрлэхээр боллоо.



УИХ-ын гишүүн Р.Бурмаа


-УИХ-ын гишүүн Р.Амаржаргалын үйлдлийг хариуцлагын төлөөх тэмцэл гэж үзэж байна. 24 жил ардчилалыг анхнаас нь босголцож, сайд хүртлэх албан тушаал хашиж байсан хүн болохгүй байгаа зүйлийг олон талаас нь харж, дүгнэсэн нь хариуцлагын төлөөх сануулга юм.  Бид одоо хамтдаа ажиллах ёстой байна. Хамтдаа хариуцлагын төлөө хууль санаачилж, хамтдаа зүтгэе гэдгийг хэлмээр байна. УИХ-ын гишүүнээрээ үлдэж, хамтарч ажиллая.



УИХ-ын гишүүн Л.Цог

- Монголын төрд хүний үг сонсдоггүй, чихгүй толгой шиг ажилладаг  хүн олон бий. Өнөөдөр гэхдээ энэ асуудлыг ярьж байгаа нь сайн хэрэг. Хэн нэгэн, аль нэг бүлэглэлээс бурууг хайх гэсэнгүй. Гэвч өөрсдөө нураачихаад өнөөдөр гэнэт сэхээ орсон юм шиг аашилдаг байх нь аюултай үзэгдэл.

Ард түмнийг ой санамжгүй мэт аашлах нь маш хортой зүйл.

Р.Амаржаргал гишүүний хувьд эрүүл бодолтой хүн ховор учраас гишүүнийхээ өргөдлөө буцаас авах боломж байгаа юу, үгүй бол өргөдлийн дагуу дэмжинэ.