Эдийн засаг хүндэрч ард түмний амьдрал дордсоор байна. Харин АН-ын дарга Н.Алтанхуяг энэ улсад ганцаараа “бүх юм сайхан” байгаа үлгэрээ үргэлжлүүлэх болсон. Үүнтэй зэрэгцэн УИХ дахь АН-ын бүлгийн дарга Д.Эрдэнэбат өр зээлийг хөрөнгө оруулалтаас илүү гэсэн байр суурийг илэрхийлж эхлэв. Хөрөнгө оруулагчдынхаа ихэнхийг хөөж гаргачихаад эдийн засгаа элгээр нь хэвтүүлчихсэн. Тэгээд дараа нь хөрөнгө оруулагчидаа эргүүлэн дуудах гэж бөөн юм болж Ерөнхийлөгч нь хүртэл манай улсад хөрөнгө оруулаач хэмээн дэлхийгээр бадарчилах болсон. Ийм эгзэгтэй үед УИХ дахь олонхийн бүлгийн дарга нь хөрөнгө оруулагчдын эсрэг хүйтэн хөндийг үг шидэх болсон нь анхаарал татаж байна.

    Тухайлбал УИХ дахь АН-ын бүлгийн дарга Д.Эрдэнэбат “…үндэсний аюулгүй байдлаа бид заавал бодох ёстой. Аливаа этгээд хөрөнгө оруулна гэдэг бол Монголд байршуулсан өмчөөрөө дамжуулж, захиран зарцуулж хараат болгоно гэсэн үг”, “Гадаадын шууд хөрөнгө оруулалт бол гадаадынх шүү дээ. Оюутолгойн гуравны хоёр нь бидний өмч биш болчихсон. Ийм байдлаар бидний биш өмчүүд Монголоор нэг тарах юм бол Монгол Улс юу болж хувирах вэ”, “…гадаадын хөрөнгө оруулалт манай баялагт эзэн суух юм бол Үндэсний аюулгүй байдал юу болох билээ гэдгээ давхар бодолцох ёстой. Хэрэв гадны хөрөнгө оруулалтыг татах юм бол Монгол Улсын эзэмших хувь нь ахиу байх ёстой” хэмээх түүний үгс хөрөнгө оруулагчдыг дахин эргэлзээнд орууллаа. Эдгээр нь Д.Эрдэнэбат гэдэг хувь хүний үг гэхээсээ илүү УИХ-ын олонхийг бүрдүүлж байгаа АН-ынхны байр суурь гэж ойлгогдож байна. Учир нь тэрээр олонхио төлөөлж байр сууриа илэрхийлж байгаа дарга нь шүү дээ.

    Өөрөөр хэлбэл тэрээр үндэсний аюулгүй байдлаар халхавчлан гадны хөрөнгө оруулалтыг шууд эсэргүүцэж байна. Бас гадны хөрөнгө оруулагчид Монголд оруулсан хөрөнгөөрөө дамжуулан үндэсний аюулгүй байдалд нөлөөлнө гэх домгийг зохиож эхлэв. Хамгийн сонирхолтой нь гадны хөрөнгө оруулагчдыг Монголд орж ирэх юм бол Монголын эзэмших хувь ахиу байна шүү гэдгийг шууд сануулах боллоо. Ингэсэн тохиолдолд хэн Монголд хөрөнгө оруулах вэ дээ.

    Хөрөнгө оруулагчдыг үргээх үг унагах болсон түүний улс орноо хөгжүүлэх гарц нь өр зээл гэнэ. Өөрөөр хэлбэл улсаа хөрөнгө оруулагчдын тусламжтайгаар биш өр зээлээр цэцэглүүлэн хөгжүүлэх нь илүү хэмээн номлох болов. Энэ талаараа ч “… бид зээлээс айх хэрэггүй. Гутранги үзэлтнүүд зээлийг “Хойч үедээ үлдээж байгаа өр” гэж ярьдаг”, “… бид зээлийг Монголоо үнэ цэнэтэй болгох, иргэдээ өмчтэй байлгах, баялаг бүтээгчтэй болгох, дэд бүтцээ хөгжүүлэх, үндэсний үйлдвэрүүдтэй болох боломж гэж харж байна” хэмээн ярих болов.

    УИХ дахь олонхийн бүлэг, тэдний дарга ийм байр суурьтай байгаа нь эдийн засгийн ирээдүйг улам ч бүрхэгдүүллээ. Хөрөнгө оруулагчдыг үндэсний аюулгүй байдлын эсрэг гэдэг утгаар цоллож, авсан өр зээлээр хийх бүтээн байгуулалтаа өөрсдийн гэх аж ахуйн нэгжүүдээр гүйцэтгүүлж, улсаа хөгжүүлнэ хэмээн ярих дарга нарын үгс айдас төрүүлж байна!