УИХ дахь МАН-ын бүлэг өнөөдөр хуралдаж дэд даргаар ажиллаж байсан С.Бямбацогтыг олонхийн саналаар бүлгийн даргаар сонголоо. Бүлгийн дарга Н.Энхболд албан тушаалаасаа чөлөөлөгдөх хүсэлтээ илэрхийлсэн учраас өнөөдөр МАН-ын Удирдах зөвлөл хуралдаж УИХ дахь МАН-ын бүлгийн даргад С.Бямбацогт, Ж.Энхбаяр нарыг нэр дэвшүүлж өрсөлдүүлэхээр болсон юм. МАН-ын бүлгийн хуралдаанд оролцсон 25 гишүүнээс 16 нь С.Бямбацогтыг дэмжлээ. Харин түүний оронд буюу бүлгийн дэд даргыг намын дүрэмд заасны дагуу өрсөлдөөний зарчмаар сонгох юм. Мөн бүлгийн хуралдаанд намын XXVII Их хурлаас хойш хугацаанд намын шинэ удирдлагууд, Удирдах зөвлөлийн гишүүдийн орон нутагт ажилласан дүнг танилцуулж, цаашид энэ чиглэлээр хэрхэн ажиллах талаар ярилцсаныг МАН-ын дарга, УИХ-ын дэд дарга М.Энхболд сэтгүүлчдэд танилцууллаа.

Сандаг овогтой Бямбацогт 1974 онд төрсөн, эхнэр, гурван хүүхдийн хамт амьдардаг. Тэрээр 1992 онд Ховд аймгийн Ховд хотын 10 жилийн хоёрдугаар дунд сургууль, 1999 онд Санхүү, эдийн засгийн дээд сургуулийг эдийн засагч мэргэжлээр төгссөн. 2005 онд Голландын Маастрихын их сургуульд бизнесийн удирдлагын магистрын зэрэг хамгаалсан. 2006-2008 онд Нийгмийн ардчилал Монголын оюутны холбооны ерөнхийлөгчөөр ажиллаж байсан. 2008 оноос хойш УИХ-ын гишүүнээр хоёронтоо сонгогдон ажиллаж байгаа залуу улстөрч юм.

Мөн 1998-2000 онд "Ховдын өргөө" ХХК-ийн ерөнхий захирал, 2000-2006 онд "Нью Прогресс" группийн захирал, 2006-2008 онд "Нью Прогресс" группийн Төлөөлөн удирдах зөвлөлийн дарга, 2008 онд "Нью Прогресс" группийн ерөнхийлөгчөөр ажиллаж байв.

МАН-ын бүлгийн дарга С.Бямбацогт хэвлэлийн бага хурлын дараа сэтгүүлчдийн асуултад хариуллаа.

-Юуны өмнө бүлгийн дарга болсонд баяр хүргэе. Ажилдаа ямар зарчим баримталж ажиллах вэ?

-Сөрөг хүчин буюу цөөнхийн бүлгийн дарга хийнэ гэдэг амар ажил биш. Хариуцлагатай, санаачилгатай, идэвх зүтгэл чармайлт гаргаж хийх ёстой ажил. Дарга гэхээсээ илүүтэй зохицуулагч менежер гэж ойлгож байгаа. МАН-ын XXVII Их хурлаас хойш намын бүлгийн гишүүд 21 аймаг, есөн дүүрэгт ажилласан. Энэ үеэр бүлгийн гишүүдийг илүү санаачилгатай ажиллаач гэсэн шаардлагыг намын гишүүд, ард иргэд тавьж байсан. Тийм болохоор бидний хувьд хийх ажил их байна. Сөрдөг биш бүтээлч бүлэг байлгахын тулд өөрөөс хамаарах бүхнийг хийж ажиллана.

-Бүлгийн даргаар сонгогдсоны дараа бүлгийн гишүүд тань юу гэж захив?

-Бүлгийн даргад Ж.Энхбаяр гишүүн бид хоёр өрсөлдсөн. Бид хоёр дахь удаагаа УИХ-ын гишүүнээр сонгогдсон. Миний хувьд бүлгийн дэд даргаар ажиллаж байсан. Гишүүдэд бидний талаар асууж тодруулах зүйл харьцангуй бага байлаа.

-2016 оны сонгуулийн өмнө Та УИХ дахь намын бүлгээ удирдах хариуцлагатай албан тушаал хүлээн авлаа. Энэ сонгуульд хэрхэн амжилттай оролцох нь та бүхнээс шалтгаалах нь ээ?

-Бүлэг дээр тулгуурлаж улс төр явагдана. 2016 оны сонгуулийн үр дүн, МАН-ын ялалт бүлгийн үйл ажиллагаатай салшгүй холбоотой. Тиймээс 26 гишүүн маань үүнд манлайлж ажиллах ёстой гэж ойлгож байгаа.

-Эдийн засгийн байнгын хорооны хуралдаанаар таны санаачилсан Хөгжлийн бодлого төлөвлөлтийг боловсронгуй болгох тухай УИХ-ын тогтоолын төслийг хэлэлцэх эсэхийг дэмжсэн. Энэ асуудлаар үндэсний зөвшилцөлд хүрэх алхмыг тавилаа гэж ойлгож болох уу?

-Өнөөдөр Монголын төр бодлогогүй байна. Бодлогогүй байгаагийн харгайгаар улсын эдийн засаг, нийгмийн нөхцөл байдал хүндэрсэн. Тийм учраас бид харилцан ойлголцож зөвшилцдөг байвал бодлого тогтвортой, тодорхой болох юм. Олонхи нь хүч түрсэн байдлаар төрийн бодлогыг тодорхойлбол цөөнх нь олонхи болсон үедээ өмнөх бодлогыг өөрчилдөг байдлаар 20 гаруй жил явж ирсэн. Энэ байдлыг өөрчлөхийн тулд бид ойлголцож зөвшилцөж ажиллах ёстой.

-Цаашдаа хууль тогтоох үйл ажиллагаатай холбоотой бодлогын төвшинд шийдэх ёстой асуудалд бүлгийн зүгээс хэрхэн анхаарах вэ?

-Засгийн газар сайн ажиллаж чадахгүй байгааг хаа сайгүй ярьж шүүмжилж байна. Цаашдаа бид Засгийн газрын хариуцлага тооцох асуудалд анхаарч ажиллана. УИХ-аар хэлэлцэх гэж байгаа хуулиуд дээр анхаарах зүйлүүд бий. УИХ-ын нэгдсэн хуралдаан, байнгын хороодын хуралдааны ирц бүрдэхгүй байна. Олонхид олонхи шиг бай, ард түмний өгсөн итгэлийг дааж ажилла гэдэг шаардлагыг тавьж ажиллана.