АН дахь хүчний хуваарилалт, эрх мэдлийн төлөөх тэмцэл олон хүний анхаарлыг татаж байна. Хамгийн сүүлийн байдлаар АН-д жигүүр байгуулна гэж мэдэгдсэн УИХ-ын гишүүн асан А.Мурат “Хөтөлийн цемент шохойн үйлдвэр” ТӨK-ийн захирал болохоо шууд илэрхийлсэн. Харамсалтай нь түүний хүсэлтийг Ерөнхий сайд Н.Алтанхуяг судалж байна гэсэн шалтгаанаар хойшлуулчихсан. Тэгээд ч “Хөтөлийн цемент шохойн үйлдвэр”-ийн захирлын асуудал шийдэгдээгүй шалгагдаж байхад нь ингэж улайрах хүн ёсны хувьд утгагүй л дээ.

    Үүнээс гадна Увсын хоёрыг эргүүлж татахаар улайрч байгаа хүн бол Д.Нямхүү. Хэдэн жилийн өмнө үүрээр гүйж, хүн айлгамаар сурталчилгаа цацаж Сүхбаатар дүүргийнхний гайхалыг төрүүлсэн. Сүхбаатар дүүрэгт хоёр ч удаа өрсөлдөөд өвдөг шороодсоны эцэст нутгаа бараадсан. Гэвч Увсчууд түүнд итгэл өгөөгүй. Тиймээс заргаар УИХ-ын гишүүн болохоор улайрч байна. УИХ-ын гишүүн болох ганц шанс нь учраас арга ч үгүй гэж өмөөрөх хүн нилээд бий.

    Хамгийн сүүлд Увсын Тариалан сумын малчдыг Улаанбаатарт авчирч хэвлэлийн бага хурал хийлгэж, CЕХ-ноос өгсөн мөнгийг нь буцаалгасан хүн бол Д.Нямхүү гэж хардах хүмүүс олон. Учир нь Улаанбаатартаа л өндөр зэрэглэлд багтдаг “Цэцэг” зочид буудалд хөдөөгийн малчдыг байршуулж тэдний зардлыг Д.Нямхүүгийн ойрын хүн төлж байгаад хэвлэлийнхэнд баригдсан гэдэг. Ингээд Д.Нямхүүг Увсаас тэднийг авчирсан гэсэн хардлага бараг л баталгаажсан юм. 
   
    Үүнтэй зэрэгцээд Д.Нямхүү УИХ-ын гишүүн болж чадахгүй бол дараагийнхаа суудлыг бодчихоод АН-ынхаа удирдлагыг сандаргаж яваа гэсэн мэдээлэл шаргал ордноор тарсан байна. Учир нь Д.Нямхүүг “Эрдэнэс Тавантолгой” ХХK-ийн захирал болгох тухай яриа хэсэг хүмүүсийн хүрээнд яригдсан мэдээлэл тарлаа. Түүнийг УИХ-ын гишүүн болгож чадахгүй бол дараагийнх нь алба “Эрдэнэс Тавантолгой” гэж санааг нь амраасан ч байж болох юм. Эсвэл өөрөө ийм бодолтой байгаагаа ч илэрхийлсэн байж мэднэ. Ямар ч байсан ийм нэгэн яриа гарч “Эрдэнэс Тавантолгой”-н одоогийн захирал Я.Батсуурийг бачууруулж байгаа бололтой. Үнэхээр Д.Нямхүүг гишүүн болгож чадахгүй бол “Эрдэнэс Тавантолгой”-н захирал болгох гэсэн олон талын сонирхол нэгдэж мэднэ. Учир нь төрийн өмчит уул уурхайн аж ахуйн нэгжүүд, энэ салбарын агентлагуудад Увсынхныг бодлогоор байршуулах болоод удлаа. Тухайлбал Цөмийн энергийн газрын даргаар Увсын Н.Тэгшбаяр гэх залууг томилсон. Дараа нь “Эрдэнэс МГЛ” хэмээх төрийн өмчит аж ахуйн захирлаар Увсын О.Сайнбуян гэх зайрмагны цехийн эзэн болсон. Одоо “Эрдэнэс Тавантолгой”-н захирлаар Д.Нямхүү томилох нь Увсын болоод Н.Алтанхуягийн бодлого байж мэднэ. Бас Д.Нямхүүг МоАХ-ын тэргүүн, хамтран бизнес эрхэлж явсан Х.Баттулга болоод Kроун бүлэглэл хүчтэй дэмжинэ. Энэ бүхний өмнө Я.Батсуурь тэсч үлдэнэ гэдэг хэцүү л дээ.

    Ямар ч гэсэн Д.Нямхүү УИХ-ын гишүүн болж чадахгүй бол “Эрдэнэс Тавантолгой” ХХK-ийн захиралаар томилогдоно гэсэн яриа эрчимтэй тарж байна.