Урьд өмнө нь үзээгүй "Монгол фашизм"-ыг энэ жил үзэж байна хэмээн 23 жил хувиараа бизнес эрхэлсэн нэгэн эмэгтэй ярив. Б.Бадамханд гэх энэ эмэгтэй "Хатан сүлжээ" компанийн захирал бөгөөд МҮХАҮТ-ын дэргэдэх "Бизнес эрхлэгч эмэгтэйчүүд"-ийн холбооны тэргүүний үүрэгт ажлыг давхар гүйцэтгэдэг гэнэ. Түүний ингэж ярих болсон шалтгаан нь сүүлийн үед төрөөс ирж буй янз бүрийн дарамттай холбоотой аж.

Тэрбээр энэ үгийг өчигдөр Ерөнхийлөгчийн бизнесмэнүүд болон сэтгүүлчидтэй уулзсан зангиагүй уулзалтын үеэр хэлсэн юм.

Өнгөрсөн сард Ерөнхийлөгч Ц.Элбэгдорж “Том төрөөс ухаалаг төр рүү” сэдэвт зөвлөлдөх уулзалтыг санаачилан  зохион байгуулсан. Уг  ажлынхаа хүрээнд УИХ-ын гишүүдтэй ч уулзаж, цаашид төрийн үйлчилгээг иргэдэд хүнд сурталгүй хүргэх ямар арга механизм байна, бизнес эрхлэгчид бизнесээ хийх бололцоог төр нь олгохын тулд юун дээр анхаарах ёстой вэ. Гол нь хэрэгжүүлэх талд УИХ ямар үүрэгтэй оролцох, Засгийн газар мөн ямар үүрэг хүлээх гээд олон асуудлыг ярилцсан юм.

Гишүүд ч уг уулзалтад маш тэвчээртэй сууж идэвхтэй оролцсон талаар Ерөнхийлөгч онцолж байна лээ.

Тэгвэл Б.Бадамханд гуай болон түүний адилаар бизнес эрхэлдэг хүмүүст санаа бодол, санал зөвлөмжөө Ерөнхийлөгчдөө дуулгах сайхан боломж олдсон нь өчигдөр байсан юм.

 “Зангиагүй” гэж тодотгосон уг уулзалт үнэхээр ч албаны яриа хэлэлцээрээс хол, санаа бодлоо чөлөөтэй илэрхийлсэн, болж бүтэхгүй байгаа зүйлээ нээлттэй ярилцсан уулзалт болсон. Энэ уулзалтад улс төрд байгаа бизнесмэнүүдээс бусад нь буюу Монголын хувийн хэвшлийг авч яваа томоохон компанийн 300 орчим удирдлага иржээ. Энэ уулзалтаар Ерөнхийлөгч цаашид хийж хэрэгжүүлэх олон ажлын эхлэлийг тавьсан бөгөөд бизнесмэнүүд ч энэ талаар санал бодлоо чөлөөтэй дэлгэж ярьсан юм.

Уулзалтыг эхлэхээс аваад дуусах хүртэл онцолсон ганц зүйл нь бизнесийн орчинг таатай болгоё, сайжруулья, төр махны ченж хийхээ болъё, баялаг бүтээгчдэд боломж олгоё, тэднийгээ дэмжье гэдэг л санаа байлаа.  Үүнд л “Том төрөөс ухаалаг төр рүү” шилжихийн бас нэгэн гол санаа нь оршиж байгаа. Тэгэхээр юунаас эхлэх ёстой, хэрхэн яаж ажиллах юм, өөрийнхөө зүгээс ямар үүрэг, оролцоотой ажиллах талаараа ч Ерөнхийлөгч танилцуулсан юм.

Үүний дараа бизнесмэнүүд үг хэлж, хурсан гомдлоо ч бас Ерөнхийлөгчид дуулгаад авсан. 

Ингээд Б.Бадамханд болон түүний нөхдийн "Монгол фашизм"-ын талаар ярьсан зүйлийг дэлгэрүүлэн хүргэе. 

“Хатан сүлжээ” компанийн захирал Б.Бадамханд: - Би татварын дарамтыг олон жил үзсэн. Гэхдээ энэ жил татварын дарамтаас гадна янз бүрийн салбарын төрөл бүрийн дарамт илүү ирдэг боллоо. Сүүлийн үед ажил руу дайрч орж ирээд ямар ч зөвшөөрөлгүй бүтээгдэхүүн хураадаг болсон. Үндэслэлээ тайлбарлахдаа иргэний гомдлоор л гэдэг. Өмнө нь гадны хөрөнгө оруулалттай компаниуд Монголд үйл ажиллагаагаа явуулж байхад төсөв бүрдчихдэг байсан. Гэтэл сая гаргасан хуулиас болоод гадныхан хөрөнгөө татчихсан. Тэгээд нөгөө төсвийнхөө зардлыг олж чадахаа байсан. Тиймээс бизнесмэнүүд буюу бид нарыг дарамталж төсвөө бүрдүүлж байна. "Хувийн бизнесмэнүүдээс ямар нэгэн “но” ол. Тэгээд хэдэн ч саяар хамаагүй торго" гэсэн зарчмаар л ажиллаж байна шүү дээ. Энэ жилийн хувьд үнэхээр “Монгол фашизм”-ийг үзэж байна. Бид үнэхээр айдастай ажилдаа ирж байгаа. Хүний халдашгүй эрхэнд халддаг. Саяхан манай салбарт шалгалт явуулсан. Тэгэхдээ намайг 10 саяар торгосон. Би алдаа хийгээгүй учраас зохих ёсны байгууллагуудаар нь явж байгаад торгуулаагүй. Тэгсэн байцаагч “Угаасаа бүх газрыг шалгаж байгаа юм. Гэхдээ та шалгуулсан учраас 3 сая төгрөг өгчих” гэсэн. Би алдаа гаргаагүй юм чинь юу гэж торгууль төлөх юм. Шууд дайрч орж ирээд шалгалт явуулсан. Аль байгууллагаас орж ирсэн дарамт гэдгийг би хэлмээргүй байна”.

“Макс” группийн ерөнхийлөгч Д.Ганбаатар: -Бизнесмэнүүдэд ирэх дарамт сүүлийн үед ихсэх боллоо. Миний хувьд ганзага зөөж олсон мөнгөөрөө авсан газраа нэг жилийн өмнө Нийслэлийн удирдлагуудад булаалгасан. Гэхдээ шүүхээр явсаны эцэст өөрийнхөө өмч гэдгийг тодорхой болголсан. Энэ мэт үнэхээр их дарамт байна. Бөөн ажил болж ганц барилга барьж эхлэнгүүт Мэргэжлийн хяналтын газар, ШӨХТГ, нийслэл, цагдаа, ОБЕГ гээд нэг их олон газраас ирээд дуртай цагтаа ажлыг маань зогсоодог. Гэтэл ажил зогсож байх хооронд банкнаас авсан мөнгөний хүү өсөөд байгаа. Тэгээд л бид алдагдалд ороод байна шүү дээ”

Энэ мэт ижил зовлонтой бизнесмэнүүд өчигдөр Ерөнхийлөгчид учир явдлаа хэлсэн нь энэ. Тиймээс ухаалаг төртэй болохын тулд төр нь төрийн ажлаа,  бизнесмэнүүд нь бизнесээ  хийдэг болгохын тулд Ерөнхийлөгч цаашид тэдэнтэй хамтарч ажиллахаа энэ үеэр илэрхийлсэн.
 
Баялаг бүтээгчдээ төр дэмжиж, гадны хөрөнгө оруулалтаа татаж чадвал бид цаашид хүчирхэг болно гэдгийг тэрбээр энэ үеэр дуулгасан. Нөгөө талаар бизнесмэнүүд ч үүнд идэвхтэй, оролцоотой, санаачилгатай ажиллах ёстой. Ингэхийн тулд өөрсдийнх ажилд хамаатай хууль санаачилбал  түүнд оролцдог санаа бодлоо илэрхийлдэг байя гэдгийг ч уг уулзалтаар тохирч авсан юм. Харин төр макро төвшний ажилдаа анхаарлаа хандуулж, микро эдийн засагт хэтэрхий гар дүрэх шаардлагаггүй гэдгийг л бизнесмэнүүд хэлж байлаа.

Бид уулзалтын талаарх мэдээллийг дэлгэрэнгүй хүргэх болно.