УИХ-ын гишүүн Р.Амаржаргалын гишүүнээс татгалзах асуудлыг УИХ-ын чуулганаар хэлэлцэж байна. Тэрбээр бусад гишүүдийн асуултад хариулж байна.

С.Дэмбэрэл: Та бидний залуу цагаасаа олон жил ярьсан сайн засаглал, ухаалаг төрийн салаа замын бэлчир дээр ирчихээд байна. Энэ асуудлаас зугтаж шийдэх юм уу, зулгааж шийдэх юм уу гэсэн сонголт дээр ирээд байна. Та зугтаж шийдэх гэж байна уу, зулгааж шийдэх гэж байна уу?
Р.Амаржаргал: Монголын парламентийн ардчилал байдаг юм бол энэ 20 хэдэн жилийн турш олон үе шатуудыг дамжлаа. Энэ хооронд шийдэл олж чадаагүй асуудлууд олон байна. Энэ ажлаа УИХ бүрэн гүйцэд хийж чадаагүй. Тухайлбал иргэн бүрт 1,5 сая төгрөг олгох асуудал. Үүнийг албажуулсан нь УИХ. Энэ амлалтын төлөө УИХ, түүнийг төлөөлсөн байгууллагууд хариуцлага хүлээгээгүй. Би бол өөрийн гэсэн тэмцлийн арга хэлбэртэй хүн. Миний арга хэлбэр хэн нэгэнд таалагдахгүй байгаа бол тэр хүний асуудал.

Я.Содбаатар: Р.Амаржаргал гишүүний хүсэлтийг хүндэтгэж байна. Үнэхээр нөхцөл байдлыг дүгнэж үзээд, ялангуяа ЗГ, парламентийн түвшинд алдаа байгааг хүлээн зөвшөөрнө. Бид нар ардчиллын тухайд ургаш том алхсан, өөрсдийгөө ардчиллын загвар жишээ гэж нэрлэж эхэлж байсан. Гэтэл энэ нэг жилийн хугацаанд ардчилал улс төрийн соёлтой болж чадаагүй  гэдгийг харлаа. Ардчиллын суурь тоосгуудыг сугалж эхэллээ. Хүний өмч, эрх рүү дайрдаг, бусад улс төрийн хүчинээ нухчин дардаг болсон. Монголын улс төрд үнэт зүйл, зарчим дутагдаж байна. Та гишүүний эрхээсээ татгазсан шалтгаанаа товч тайлбарлана уу.
Р.Амаржаргал: Би дөрвөн үндсэн асуудлаар шалтгаанаа тайлбарласан.
   1. Хариуцлагын тогтолцоо зайлшгүй байх ёстой, үүнийгээ хэрэгжүүлдэг байх ёстой. ЗГ-ын хариуцлага алдсан сайдын асуудлыг УИХ-аар оруулах нөхцөл, боломж  өнөөдөр байна уу. Нэг хүн ардаа арван гишүүнтэй, фракцтай байгаа үед хэрэгжихгүй байна. Үүнийгээ өөрчилье. Сүүлийн арван хэдэн жил энэ хэвээрээ байна.
   2. Ёс суртахууны асуудал болохоо байлаа.  Монголын ардчиллын амин сүнс нь зөвшилцөл. Үүнийг 24 жил ярьж байна. Гэтэл дөлөөд зугтаад байдаг. Үүнийг шийдэхгүй байгаагийн хариуцлагыг хэн нэгэн хүлээх ёстой.
   3. Өнөөдөр эдийн засгийн хүндрэлийг шийдэхдээ яам, агентлаг байгуулж, тэр хэрээрээ хувийн сектороо шахаад байна. 
    4. Намын харьяалал, боловсон хүчиндээ анхаарах хэрэгтэй байна. Намаар дамжсан улс төр, төрийн ажил цааш явахгүй гэв.