Улс төрд тунчиг өнгөлөг гарч ирээд харамсалтайгаар албаа дуусгасан хүн бол “Хас”-ын хэмээх Ч.Ганхуяг юм. Түүнийг Сангийн дэд сайдаар томилоход олон хүн итгэлийн харц унагаж байсан цаг саяхан. Харин элдэв янзын мэдэгдэл, дэл сул яриагаараа төрийн албаныханы гайхалыг төрүүлэх болсноор тэрхүү итгэл алдарч эхэлсэн.

    Дараа нь талхны үнийн талаарх сэтгүүлчийн асуултад бүдэрсэн нь ихээхэн дуулиан дэгдээсэн юм. Тэгээд хямдхан талх байдаг, тэрийг хэлсэн гээд жижигхэн талх тавьчихаад баахан хэрүүл хийсэн нь нэмэх биш хасах оноо авчирсан. Ингээд “талх” Ч.Ганхуяг гэсэн салшгүй имиж бүрдүүлсэн.

    Хамгийн сүүлд валютын ханш өссөнд бухимдан төрийн гурван өндөрлөгт салаавч гаргаж дараагийнхаа сенсаацийг тарьж, “талх” хэмээх алдараа “салаавч”-аар сольсон. Хэсэг хугацааны дараа нилээд эргэцүүлж байгаад “тэгж эсэргүүцэл үзүүлэхийг би бодож олоогүй.  Энэ  саваагүй үйлдэл байсан” хэмээн байр сууриа илэрхийлж уучлал гуйсан юм. Тэгэхдээ бүүр шалдаа бууж “Төрийн ордныхоо гадаа очиж, Ерөнхий сайдынхаа цонх руу, Их хурлын даргынхаа цонх руу бүдүүлэг үйлдэл хийсэндээ албан ёсоор уучлал гуйя.   Уучлал гуйхад надаас их зүйл гарахгүй. Би өөрийнхөө алдаа шүүмжлэлийг хүлээж авч чаддаг хүн. Үүгээр залуус маань тодорхой нөхцөл байдалд үйлдэл хийхдээ бас бодолцож дараа дараагийн алхмуудаа хийж байгаасай гэсэн тийм жишиг, нөгөө талаасаа уучлал гуйхаас битгий айж бай гэдгийг үзүүлж байгаа юм” хэмээн учирласан юм. Ийм үйлдэл хийснээрээ бодлогогүй алхам хийдэг гэдгээ л нотолсон болохоос нэр хүндээ өсгөөгүй. Ч.Ганхуягийн нэр хүнд ганц миллиметрээр ч өсөөгүй. Харин ч нилээд хэдэн сантиметрээр доошилсон.

    Эх сурвалжийн мэдээлж байгаагаар бол тэрээр дараагийнхаа уучлалыг гуйхаар бэлдэж байгаа гэнэ. Тэр нь талхны үнийг мэдэхгүй байсныхаа төлөө олон нийтээс “ард түмнийхээ хойморт гарах цэнхэр дэлгэцээр ард түмнийхээ нүд рүү харж байгаад талхны үнийг мэдэхгүй бүдүүлэг үйлдэл хийсэндээ уучлал гуйя” гэх бололтой. Найз нөхөд нь түүнийг шоглоод “нэгэнт чи салаавчныхаа төлөө уучлал гуйсан юм бол талхны үнийг буруу хэлснийхээ төлөө ч адилхан уучлал гуйх ёстой” гэж шахаж шаарджээ. Түүгээр ч барахгүй “манай Хуягаа талхны үнийг буруу хэлснийхээ төлөө уучлал гуйх гэж байгаа” хэмээн инээлддэг болсон сурагтай.

    Ийнхүү Ч.Ганхуяг найз нөхдийнхөө шахалтаар талхны үнийг буруу хэлснийхээ төлөө ард түмнээс дахин уучлал гуйж магадгүй байна.