2016 он гэхэд бүх яамыг нэг байранд төвлөрүүлэхээр болжээ. Энэ ажлыг Ерөнхийлөгч Ц.Элбэгдорж санаачилсан бөгөөд хэрэгжүүлэх тал дээр Ерөнхий сайд Н.Алтанхуяг, Хотын дарга Э.Бат-Үүл нарыг яаравчлуулж байгаа гэнэ.

Ингэхдээ 2016 оноос өмнө бүх яамны байрыг дуудлага худалдаагаар худалдана. Үүний дараа теднер зарлаж, барилга барих компанийг сонгон шалгаруулах аж. Харин газрын зөвшөөрлийг нийслэлээс олгох юм байна. Тэр газар нь МАХН-ын дарга Н.Энхбаярын хууль бусаар эзэмшиж байсан “Улаанбаатар таймс” сонины байр бөгөөд одоо байгаа барилгыг нь нурааж газрыг нь ашиглах аж.

 Н.Энхбаярыг хууль бусаар уг барилгыг эзэмшиж байсан гэж шүүхээс үзээд хоёр жилийн өмнө улс эргүүлэн өөрийн өмчдөө авсан байдаг. Ингээд тус газар дээр орчин үеийн загвар, дизайнтай 20 давхар барилгыг бариулах юм байна. Тэр 20 давхар байранд нь Батлан хамгаалах, Хууль зүйн яам хоёроос бусад бүх яам байрлах гэнэ. Тус барилгын зураг төслийг Төрийн ордонтой хонгилоор шууд холбогдох маягаар хийж байгаа тухай зарим эх сурвалжууд хэлж байна. “Улаанбаатар таймс” сонины байр бол Төрийн ордонтой маш ойрхон. Тиймээс яамд байх хамгийн зохимжтой байршил гэсэн үг юм.

Ерөнхийлөгч яамдыг нэг дор цуглуулах нь “Том төрөөс ухаалаг төр рүү” ойртож байгаагийн бас нэгэн илрэл гэж үзэж байгаа гэнэ.  Хэрвээ яамд нэг дор байрлавал хоорондоо уялдаа холбоотой ажиллахаас эхлээд хаа, сайгүй газар эзэмшиж, том, том барилгыг өмчлөх шаардлагагүй болж байна гэсэн үг. Үр дүнд нь төрийн данхар бүтэц багасна. Цаашилбал яамдын одоо байгаа байрыг бусад газруудад түрээслэж ашиг олохоос эхлээд давуу тал ихтэй юм.
 
Одоогийн манай төрийн бүтцийг харвал Ерөнхий сайд, Шадар сайдын харъяанд багтах агентлагууд,  Засгийн хэрэг эрхлэх газрыг оруулалгүй 14 яамны бүтцээс өнгөцхөн  авч үзвэл Гадаад харилцааны яам 14, /онцгой албадыг оруулаад/ бусад нь  дөрвөөс зургаан газартай байх жишээтэй. Яам бүрийн бүтэц ойролцоо бөгөөд бүгдэд Төрийн захиргаа удирдлага, Хяналт шинжилгээ, мониторинг, Бодлого зохицуулалт, төлөвлөлт, Бодлогын хэрэгжилтийн  газрууд гэж байх. Өөрөөр хэлбэл, дунджаар нийт яамдын хэмжээнд 70 орчим газар байж, тэнд дор хаяж нэг газарт  нь таваас долоон хүнтэй, зарим нь  арав гаруй ажилтантай гээд бодоход 350-400 ажилтан байдаг байна. Яам бүрт бодлогыг нь төлөвлөдөг, хэрэгжүүлдэг хоёр тусдаа газар байх зэргээс үзвэл манай төрийн алба хэт нүсэр юм. Тэгэхээр яамдыг нэг байранд төвлөрүүлснээр дээрх гаж бөгөөд дэндүү том бүтцийг арилгахад тустай юм. Цаашдаа яам, агентлаг бүр бодлогоо гаргаад байх биш Монголын хөгжлийн хүрээлэнг нэн даруй байгуулаад салбар, салбарын мэргэжилтнүүдийг тэнд цуглуулан судалгаа хийлгэхэд л болох жишээтэй.

Яваандаа яамд нь зөвхөн судалгаа хийдэг газар болох нь зөв гэж үзэх хүмүүс байна. Ямартай ч яамдыг цэгцлэх хамгийн эхний ажил нь нэг байранд төвлөрүүлэх. Үүний дараа бодлогыг бусад шинэчлэлийг хийх юм байна.