Улсын Их Хурлын чуулганы өнөөдрийн /2013 оны 12 дугаар сарын 13/ үдээс өмнөх хуралдаанаар Улсын Их Хурлын гишүүн Д.Сумьяабазарын Боловсрол, шинжлэх ухааны сайдад тавьсан асуулгад хариу өгснөөр эхлэв.

УИХ-ын гишүүн Д.Сумьяабазар нь, Боловсрол, шинжлэх ухааны яамнаас ерөнхий боловсролын сургуулийн сурагчдын сурах нөхцөл боломжийг сайжруулах чиглэлээр санаачлан зохион байгуулсан томоохон ажлууд, хүрсэн үр дүнгийн талаар мэдээлэл өгөхийг хүссэний сацуу анги дүүргэлт, нэг багшид оногдох сурагчдын тооны стандарт, түүний мөрдөлт ямар түвшинд байгаа талаар асуулга тавьжээ.

Мөн яамнаас сурагчдын хувцасны үнийг тогтоохдоо ямар судалгаанд үндэслэсэн, дүрэмт хувцсыг айл өрх бүр амьжиргаандаа тохируулан нэмэлттэй болон нэмэлтгүй авч байгаа нь хир зохимжтой гэж үзэж байгаа, дүрэмт хувцсыг үйлдэрлэсэн өртгийн хичнээн хувь нь бодитойгоор эх орны үйлдвэрүүдэд ногдож байгаа талаар тэрээр асуусан байна.

УИХ-ын гишүүний асуулгад Боловсрол, шинжлэх ухааны сайд Л.Гантөмөр хариулахдаа, цэцэрлэг, сургуулийн суралцах орчин ямар байгаа, шинэчлэлийн Засгийн газар ерөнхий боловсролын сургууль, цэцэрлэгийн өнөөгийн хүчин чадал нь хэрэгцээг хангаж чадахгүй зэргээс үүсч буй нөхцөл байдлаа хэрхэн үнэлж, бодлого, стратегиа тодорхойлж байгаа, 2013 онд хэдэн сургууль цэцэрлэг, дотуур байр, спорт заалыг ашиглалтад оруулсан, 2014 онд тэдгээрт хир хэмжээний төсөв тусгагдсан, дүрэмт хувцасны хангамж ямар байгаа талаар хариулт өглөө.

Одоогийн байдлаар Боловсролын газруудын баталсан загварын дагуу эх орондоо үйлдвэрлэж байгаа шинэ загварын дүрэмт хувцсыг өмсөхөөр сонголтоо хийж, захиалга өгсөн сургуулиудын дүрэмт хувцасны борлуулалт нийслэлд 1-3 ангид 98 хувь, 4-5 дугаар ангид 40 орчим хувьтай байгаа бөгөөд 10 дугаар сарын 14-ний өдрөөс эхлэн бүх аймгуудад сурагчдын дүрэмт хувцсыг хүргэх, борлуулах ажил эхлээд байгаа ажээ.

Дүрэмт хувцасны борлуулалт 12 дугаар сарын 25-нд улсын хэмжээнд дуусгахаар төлөвлөсөн байна.

Үүнээс гадна дүрэмт хувцасны үйлдвэрлэлд манай улсын оёдлын салбарын 65 хувь, сүлжмэлийн салбарын 81 хувь, ноос ээрэхийн 98 хувь, ноос самнахын 98 хувь, ноос угаахын 25 хувийг эзлэх үйлдвэрлэгчид ажиллаж байгаа гэсэн мэдээллийг Боловсрол, шинжлэх ухааны сайд Л.Гантөмөр өглөө.

Асуулга болон түүнд өгсөн Боловсрол, шинжлэх ухааны сайдын хариулттай холбогдуулан Улсын Их Хурлын зарим гишүүн асуулт тавих хүрээнд, сурагчдын дүрэмт хувцасны чанар, өнгө үзэмж, хийц муу төдийгүй өндөр үнэтэй байгаад шүүмжлэлттэй хандлаа.

Мөн 6 настай сурагчдад сурах боломж, нөхцөлийг хангах талаар тусгайлсан бодлого байгаа эсэх, сурах бичгийн хангамж, хуваарилалтыг сайжруулах талаар ямар арга хэмжээ авах, хөдөө орон нутагт концессийн гэрээгээр сургууль, цэцэрлэг барих талаарх боломж, гэр цэцэрлэг байгуулах стандарт журам байдаг эсэх, сургуулийг тойргийн системээр байгуулах боломжийн талаар Улсын Их Хурлын гишүүд асуулт тавьж хариулт авав.

Үүнээс гадна улсын хэмжээнд ялангуяа хөдөө орон нутагт сургууль, цэцэрлэг, спорт заалны хангамжийг сайжруулах, тэдгээрт хамрах хүрээг өргөжүүлэх, сургуулиудын ачааллыг бууруулах, дүрэмт хувцас хүүхдийн эрүл мэндэд сөргөөр нөлөөлж буй талаар асуухын зэрэгцээ багшийн ажлын үнэлэмж, сургууль, цэцэрлэгийн хүүхдийн өдрийн хоолны хүрэлцээ, хангамж, Баян-өлгий аймагт монгол хэлний сургалт ямар байгаа, гурван ээлжтэй зарим сургуулиудыг хоёр ээлжтэй болгох зэрэг асуудалд салбарын сайдын анхаарлыг хандуулав.

Улсын Их Хурлын гишүүн Д.Сумьяабазарын асуулгад хариулт өгч дуусгаснаар Улсын Их Хурлын чуулганы өнөөдрийн хуралдаан өндөрлөв гэж УИХ-ын Хэвлэл, мэдээлэл, олон нийттэй харилцах хэлтсээс мэдээлэв.