Өнгөрөгч сарын 16-ны өдөр Төрийн ордонд Монгол улсын ерөнхийлөгч санаачлан чуулган хийснээс хойш хүмүүс” ухаалаг төр”-ийн тухай их ярих болов.  Хөдөө гадааны хүмүүс, эмнэлэг сувилалд хэвтэгсэд ерөнхийлөгч юу яриав гэж асуух.

Ерөнхийлөгч ингэхэд юу яриад байгаа юм бэ. Ерөнхийлөгч ухаалаг төртэй болохын тулд юу хийх вэ гэж ярисан. Юу хийх вэ гэдэг асуултын хариулт нь юу хийхгүй вэ гэдэгийн нөгөө тал.
Юу хийхгүйгээ тодорхой болгох нь юу хийх вэ гэдгийг бодоход хялбар болгоно. Үүнийг хүн болгон, байгууллага болгон хялбар гаргачихаж чадна.

Жишээ нь телевизийн байгууллага бол

- Хулгайн контент гаргахгүй

- Төлбөр бариад ирсэн ч, “эдийн засагч” Дашзэвэг, Сарандаваа багш, фэнг-шүй Ганбаа... гэх мэт эфирт гаргахгүй хүмүүсийн жагсаалт гаргаж болно. “Хашгирахыг нь популистууд хийдэг, төлбөрийг нь ард түмэн төлдөг” гэж  Ц.Элбэгдорж  хэлсэн.

Хувь хүн, байгууллага

- “ Төр дорвитой арга хэмжээ авахгүй байна” гэж гоншигнохгүй. Учир нь төр ямар нэг арга хэмжээ авах бүрт та бидний татварт төлсөн мөнгө урсаж байгаа юм.

Ерөнхийлөгчийн ярьсан зүйлс тоо, баримтанд тулгуурласан, итгэл төрүүлэхүйц байсан тул цочирдуулсан. Жишээ нь, ДНБ дэх төсвийн зардал 2014 онд төлөвлөсөнөөр 7.3 ихнаяд буюу 41,1 хувь болж байна.  Энэ юу гэсэн үг вэ. Дэлхий нийтэд “татварын эрх чөлөөний өдөр” гэж ойлголт байдаг.Энэ нь дээрх ДНБ дэх төсвийн зардлын хэмжээнээс шалтгаалан өөр өөр байх ба хэр данхайсан төртэй байгааг, төрийн оролцоог,бизнесийн орчны нэг илтгүүр болдог.Манай орны хувьд хувийн хэвшлийнхэн жилийн  365 хоногийн 41 хувь буюу 150 хоног нь бид төрийн төлөө ажиллаж байгаа ба энэ нь ойролцоогоор  5 дугаар сарын 30-ний өдөр тохиох аж. Жилийн бараг талыг та данхар төрийн төлөө ажиллаж,амьдарч өнгөрүүлж байна гэсэн үг.

Одоо төр маань юу хийхгүй вэ гэдэг жагсаалтаа гаргаж өгмөөр байна.

- Төр ухаалаг болох гэж УИХ-н гишүүдэд IPAD тараахгүй гэдэг ч юм уу.

- Салбарын төв хэвлэл гэж гаргахгүй ч гэдэг юм уу./ Төр өөрийн эзэмшилд хэвлэл мэдээлэлтэй байхыг хориглосон байтал зузаан гээч нь номыг нэг агентлаг гаргасаар байгаа/

Цааш нь хүмүүс жагсаалтанд саналаа нэмэрлэнэ биз.
Төрийн хийхгүй зүйлсийн жагсаалт уртсах тусам “татварын эрх чөлөөний өдөр” наашилж та бид өөрийнхөө төлөө зарцуулах өдөр уртсах юм.