УИХ дахь МАН-ын бүлэг хуралдаж, энэ долоо хоногт УИХ, байнгын хороодоор хэлэлцэх хуулийн төслүүдийг хэлэлцсэн байна.

Өнөөдрийн МАН-ын бүлгийн хурлаар Засгийн газрын зарим гишүүдэд хариуцлага тооцох асуудлыг хөндсөн байна. Ингэхдээ улсын эдийн засаг, төсөв хүндэрсэн учраас салбарын яамдын сайд нарыг огцрох шаардлагатай гэж үзээд Сангийн сайд Ч.Улаан, Эдийн засгийн хөгжлийн яамны сайд Н.Батбаяр нарыг огцруулах хүсэлтээ өнөөдөр УИХ-д өргөн барина гэв. Бусад сайд нар ч ажлаа хийж чадахгүй бол цаашдаа хариуцлага тооцох асуудлыг ярина. Ингэхдээ иргэдийнхээ санаа бодлыг тухай бүрт нь сонсож байх болно гэлээ.

Хоёрдугаарт Газрын тухай хуулийн хэлэлцэх асуудлын талаар хэлэлцсэн байна. Тус хуулийг хэлэлцэхдээ олон заалтыг тодорхой  болгох шаардлагатай гэж МАН-ын бүлэг үзжээ. Тухайлбал газрыг малчдад эзэмшүүлэхдээ тэднээс санал бодол, байр суурийг нь сонсох ёстой гэв. Хэрвээ малчдад бэлчээрийг нь эзэмшүүлбэл цаашид олон сөрөг үр дагавар гарч магадгүй. Тиймээс уг хуулийн төсөл дээр ажлын хэсэг гаргаж ажиллахаар болжээ. Мөн газрыг гадаадын иргэнд эзэмшүүлэх гэсэн заалт дээр нухацтай хандах ёстой гэв. 

Мөн УИХ-ын тухай хууль, Засгийн газрын үзэл баримтлалын тухай хуулинд өөрчлөлт оруулах хуулийг Ерөнхийлөгч  Ц.Элбэгдорж санаачилан өргөн барьж байгаа. Тодруулбал, Засгийн газрын гишүүн УИХ-ын гишүүний албыг давхар  хашихгүй байх гэдэг асуудал дээр тус хуулийг заавал 2016 оны долдугаар сарын 1-ны өдрөөс эхлэн мөрдөх биш цаг алдалгүйгээр 2014 оноос буюу хууль батлагдсан өдрөөс нь эхлэн  хэрэгжүүлж эхлүүлэх нь зөв гэж үзсэн байна.  

Дараагийн хэлэлцсэн асуудал нь цалин, тэтгэвэр тэтгэмжийг  үнийн өсөлттэй уялдуулж нэмэх шаардлагатай гэж үзсэн байна. Сүүлийн хоёр жилийн хугацаанд ганц ч удаа цалин, тэтгэвэр тэтгэмжийг нэмээгүй учраас энэ жил 30 хувиар нэмэх шаардлагатай гэж үзэж байгаа аж.