УИХ дахь Ардчилсан намын бүлгийн дарга Д.Эрдэнэбат сэтгүүлчдэд мэдээлэл өглөө. Тэрбээр энэ үеэр Ерөнхийлөгчийн өргөн барьсан хуулийн төслийг дэмжиж буйгаа мэдэгдэв. Мөн УИХ-ын гишүүн, Засгийн газрын гишүүний албыг давхар хашихгүй гэсэн хуулийг энэ удаагийн парламентад бус 2016 оны долдугаар сарын 1-нээс хэрэгжүүлэх нь зөв гэж үзэж байгаа аж. 

Бүлгийн зүгээс валютын ханшийг тогтворжуулах чиглэлээр гишүүдийн санаачлагыг дэмжиж олон ажил хийхээр төлөвлөж байгаа аж. Валютын ханшийг тогтворжуулахын тулд хөрөнгө оруулалтыг дэмжих, валютын урсгалыг нэмэгдүүлэх, импортыг орлох бүтээгдэхүүнийг нэмэгдүүлэх зэрэг энэ чиглэлийн олон ажлыг эрчимжүүлэх шаардлагатай гэж АН-ын бүлгийн дарга онцоллоо.

Хурлын үеэр МАН-ын бүлгийн хийсэн мэдээлэлтэй холбогдуулан сэтгүүлчид түүнээс дараах асуултыг асуусан юм. 

- МАН-ын бүлгийн зүгээс Ерөнхийлөгчийн санаачилсан хуулийг наашлуулах байр суурьтай байгаагаа илэрхийлсэн.  Өөрөөр хэлбэл хууль батлагдсан өдрөөс эхлэн мөрдөж эхлэх ёстой гэж байсан. Та бүхэн энэ саналыг хэрхэн хүлээж авах вэ?

-Ерөнхийлөгчийн санаачилсан хуулийн төсөлд хэрэгжих хугацааг 2016 оны долдугаар сарын 1-ны өдөр гэсэн. Хууль хэлэлцээд эхлэхэд ямар өөрчлөлт санал орохыг хэлж мэдэхгүй байна. Манай бүлгийн зүгээс Ерөнхийлөгчийн санаачилсан хугацааг  дэмжинэ.

-Эдийн засгийн хөгжлийн сайд Н.Батбаяр болон Сангийн сайд Ч.Улаан нарт хариуцлага тооцох асуудлыг УИХ-ын чуулганаар хэлэлцүүлнэ гэдгээ МАН-ын бүлэг мэдэгдлээ. Энэ тал дээр ямар байр суурьтай байгаа вэ?

-Засгийн газрыг огцруулах нь сөрөг хүчний үндсэн үүрэг байх. Шинэчлэлийн Засгийн газар байгуулагдсан цагаас МАН-аас өнөөдрийг хүртэл сайд нарыг огцруулах асуудлыг ярьж ирсэн. Сайны хажуугаар бүтэхгүй байгаа зүйл байгааг үгүйсгэхгүй. Засч сайжруулах гээд зүтгэж л байна. Бидний зүгээс энэхүү саналыг хүлээж авахгүй. Ард иргэдийн амьдрал улс орны нийгэм, эдийн засгийн байдал тогтвортой байхын тулд төр засгийн үйл ажиллагаа тогтвортой байх ёстой.