УИХ-ын гишүүн Р.Амаржаргалын өрөө эзэнгүй байсаар хэдэн сар боллоо. УИХ-ын өмнөөс хариуцлага хүлээж, ажлаасаа халагдах өргөдөл өгсөн тэрбээр гишүүний ажлаа хийх нь байтугай Төрийн ордноор харагдахаа больсон. Өөрийнх нь тухай асуудлыг хэлэлцэх үеэр л мэр сэр үзэгддэг. Нэгэнт ажил хийх сонирхолгүй болсон Р.Амаржаргал намынхан нь эсэргүүцсээр байсан ч ажлаас чөлөөлөх хүртэл нь өргөдлөө өгнө гэдгээ хэлсэн. У.Хүрэлсүхийг явна гэхэд долоо хоногийн дотор шийдсэн атлаа Р.Амаржаргалыг өөрөө шаардсаар байхад нь явуулахгүй байгаа ийм сонин үзэгдэл өмнө нь гарч байгаагүй. Тэгвэл үүнээс ч сонин, сонирхолтой үйл явдал ойрын өдрүүдэд өрнөх нь. Тодруулбал, УИХ-ын гишүүн Р.Амаржаргал өөрийнх нь эрхийг зөрчиж, албадан хөдөлмөр эрхлүүлж байна хэмээн УИХ-ыг шүүхэд өгөхөөр бэлдэж эхэллээ. Энэ талаар тэрбээр зарим гишүүд болон хуульчидтай уулзаж байгаа аж.

    Уг нь манай улс Албадан хөдөлмөрийн тухай 29 дүгээр конвенц, Албадан хөдөлмөрийг хориглох тухай 115 дугаар конвенцид тус тус нэгдэн орсон байдаг. Тодруулбал, шүүхээс албадан ажил хийлгэх ял шийтгэгдсэнээс бусад тохиолдолд ялтныг албадан хөдөлмөрлүүлэх ёсгүй байдаг. Гэтэл Р.Амаржаргал гишүүнийг өөрөө хүсэхгүй, халагдъя гээд байхад нь хүчээр ажиллуулах гээд байгаа нь хууль зөрчиж байгаа юм. Хэрэв энэ чигээрээ шүүхээд хандвал шүүхийн шийдвэр Р.Амаржаргал гишүүний талд гарч, УИХ буруудна гэдгийг хуульчид хэлж байна. Тиймээс нэг суудлаа авч үлдэх гэсэн АН-ын хувьд багагүй бэрхшээл учирлаа. Өмнө нь ямар ч гишүүн УИХ-ыг шүүхэд өгч байсан явдал гарч байгаагүй. Тэр тусмаа “ажил хийнэ, хийхгүй” гэсэн сонин шалтгаанаар.

     УИХ-ын дэд дарга Р.Гончигдорж энэ намыг хамт байгуулсан нөхрөө зэмлэж, “Хариуцлага хүлээнэ гэдэг нь үүргээс зугтаахын нэр биш. Шударга байна гэдэг нь болохгүй бүхний дундуур тоосонд булуулж байж ажил хийхийг хэлдэг юм. Хүнд үед хэрэгтэй газраа хэрэгтэй зүйлээ хийх ёстой. Энэ үед АН-д нэг суудал хичнээн үнэтэйг мэдэж байгаа байх.УИХ дахь нэг суудлаа алдахгүйн тулд би энэ шийдвэрийг дэмжихгүй байна” гэсэн. Гэсэн ч энэ тайлбар хуулийн өмнө хүчгүй.
   Ц.Нямдоржийн хэлснээр ажлын өрөөнөөсөө бичиг, цаасаа аваад явсан “Сэтгэлгүй хүнээр яах юм бэ?”. Тэр тусмаа ажлаа хийхгүйн тулд шүүхэд хандаж байгаа хүнээр яах билээ? У.Хүрэлсүхийг болохоор долоо хоногийн дотор шийдээд явуулдаг, Р.Амаржаргалыг болохоор хэдэн сараар уях...