УИХ дахь МАХН-МҮАН-ын Шударга ёс эвслийн бүлэг ээлжит бусаар хуралдаж,   МАН-ын бүлгээс тавьсан Сангийн сайд Ч.Улаан, Эдийн засгийн хөгжлийн сайд Н.Батбаяр нарыг огцруулахтай холбоотой асуудлыг хэлэлцжээ.  Шудрага ёс эвслийн бүлгийн хуралдаанд Ерөнхий сайд Н.Алтанхуяг, Эдийн засгийн хөгжлийн сайд Н.Батбаяр, Сангийн сайд Ч.Улаан нар оролцож мэдээлэл хийсэн байна.  

Ингээд Шудрага ёс эвслийн бүлгээс хоёр сайдыг огцруулах үндэслэлийг дэмжихгүй гэдэг дээр байр сууриа нэгтгэжээ. Учир нь МАН-ын бүлгээс тавьсан үндэслэлийг ажлаас нь огцруулах хэмжээний үндэслэл биш гэж үзсэн байна.

Гэхдээ тодорхой хэмжээний хариуцлагыг сануулж, ажлаа сайжруулах ёстой гэдэг шаардлагыг Шудрага ёс эвслийн бүлгээс Н.Батбаяр, Ч.Улаан сайд нарт анхааруулжээ.  Тодруулбал, МАН-ын бүлгээс тавьсан үндэслэлд дурьдагдсан эдийн засаг, төсөв санхүүгийн хүрээний хүндрэлүүдтэй холбоотой тодорхой асуудлыг анхааралдаа авах нь зүйтэй гэжээ.

МАН-аас тавьсан үндэслэлүүдэд төсвийн алдагдал, Чингис бондын санхүүжилттэй холбоотой асуудал зэрэг хүрээнд Сангийн сайд, Эдийн засгийн хөгжлийн сайд нарыг огцруулах асуудлыг тавьсан байсантай эвслийн бүлэг дэлгэрэнгүй танилцсан гэв.

Тус бүлгийн хуралдаанд Ерөнхий сайд Н.Алтанхуяг оролцсон бөгөөд түүнээс эвслийн гишүүд танхимын хоёр сайдыг нь огцруулах асуудалд ямар байр суурьтай байгаа, эдийн засаг, санхүүгийн зарим хүндрэлүүдийг хэрхэн даван туулах, энэ өвөл, ирэх хавар эдийн засаг ямар байдалтай байх талаар санал, байр суурийг нь сонссон байна.

Бүлгийн хурал дээр Ерөнхий сайд мэдээлэл хийхдээ "Өнөөдөр үүсээд буй төсөв санхүү, эдийн засгийн тодорхой хүндрэл нь Засгийн газар бүрэн эрхээ хэрэгжүүлж эхэлснээс хойш бий болоогүй. Гадаадын хөрөнгө оруулалт болон эдийн засгийн өсөлт тодорхой хэмжээгээр буурсан нь зөвхөн манай дотоод хүчин зүйлээс бус бүс нутаг дэлхийн хэмжээнд болж буй эдийн засгийн үзэгдэлтэй яах аргагүй холбоотой.  Үүнтэй холбогдуулан Оюутолгойн хоёр дахь шатны хөрөнгө оруулалтыг хийлгэх тал дээр илүү бодит ажлыг эрчимтэй хийх шаардлага байгаа. Энэ  чиглэлээр холбогдох хүмүүс ч ажиллаж байгаа. Хэдийгээр эдийн засаг, төсөв санхүүгийн байдал хүндрэлтэй байгаа ч Н.Батбаяр, Н.Улаан сайд нар нь манай салбарын гол зүтгүүр болсон хүмүүс. Тэд  1.5 тэрбум долларын бонд босгосон, бондын санхүүжилтээр дамжуулаад их бүтээн байгуулалтын ажлыг эхлүүлсэн, эдийн засгийн өсөлтөө хадгалах чиглэлээр нилээн шинэ ажлыг зохион байгуулж байгаа. Энэ бүхэн яах аргагүй уг хоёр сайдын туршлагатай холбоотой" гэж ярьжээ. Тэрбээр мөн  Н.Батбаяр, Ч.Улаан сайдын асуудлаар нилээн нухацтай ярилцаж, олонхийг бүрдүүлдэг улс төрийн хүчний хувьд сайд нарыг бодолцож үзэхийг  хүсчээ. МАН-ын бүлгийн гаргасан өргөдлөөс хоёр сайдыг огцруулах үндэслэлийг олж харахгүй байна гэж Ерөнхий сайд үзэж байгаа аж.