Монгол Ардын Намын удирдлагууд XXVII Их хурлынхаа шийдвэрийг сурталчилж 21 аймаг, есөн дүүрэг, бүх сумдад  ажилласан. Тэгвэл тэд өчигдөр уг аяныхаа хаалтын үйл ажиллагааг Тусгаар тогтнолын ордонд зохион байгуулж  гишүүд, дэмжигчидтэйгээ уулзжээ. Уг уулзалтад МАН-ын дарга М.Энхболд, Ерөнхий нарийн бичгийн дарга Ж.Мөнхбатаас гадна бүс хариуцсан нарийн бичгийн дарга нар оролцов.

Энэ үеэр МАН-ын дарга М.Энхболд өнгөрсөн хугацаанд их ажил амжуулсан гэж хэлээд тэр дундаа Монголын улс төрийн намын дарга нартай зөвшилцөх санамж бичигт гарын үсэг зурсаныг илүү онцолов. Мөн өнгөрсөн сарын хугацаанд иргэдтэйгээ тогтмол уулзсан гэдгийг  дурдсан юм.

Харин улс эх орны амьдрал зутруухан байгааг иргэдтэй уулзсан уулзалтаас тод мэдэрснээ тус намын удирдлагууд хэллээ.  Ирэх оны төсвөө түүхий баталснаас эхлээд УИХ-д алдаа олон байгааг уулзсан иргэн бүр шүүмжлэлтэй хэлсэн аж. Тиймээс нэгэнт баталчихсан төсөв гэж орхихгүйгээр төрийн эдийн засгийг сульдаанд оруулсан Сангийн яамны сайд Ч.Улаан, Эдийн засгийн хөгжлийн яамны сайд Н.Батбаяр нарыг огцруулах нь зөв гэж үзэж байгаа аж. 

Харин МАН-ын Ерөнхий нарийн бичгийн дарга Ж.Мөнхбат энэ талаар ярихдаа "Ерөнхий сайдын хэлдэг “Амьдрал сайхан байна”, “Будаа үнэтэй байвал гурил худалдаж аваад идчихээч. Сайхан шүү дээ” зэрэг егөөдсөн үгс иргэдийн хувьд доромжлол шиг сонсогдож байна" гэв. Тэрбээр эдийн засаг өндөг шиг эмзэг байгааг сануулж Монгол төгрөгийн ханш хэрхэн унасныг нэг ширхэг нэгтийн доллар 17 боодол нэг төгрөгтэй тэнцэж байгаа жишээгээр үзүүллээ.  “Үнэ тогтворжуулах” хөтөлбөр нэрээр төсвөөс мөнгө гаргасан ч үр дүн нь ард иргэдэд бус ашиг хонжоо хайсан хэдхэн хүнд хүрсэн гэж иргэд үзэж байгааг дамжуулжээ.

Ж.Мөнхбат энэ талаар үргэлжлүүлэн ярихдаа "Өнөөдрийн байдлаар эрх баригчид таван тэрбум ам.долларын “Чингис” бонд хэмээх өрийг босгож 1.5 тэрбумыг нь ямар ч хяналтгүй зарцуулж байгаа нь ард олны санааг зовоож байна. Эрх баригчид сонгуульд оролцохдоо төрийн албыг цомхон чадварлаг байлгана гэж амласан ч яамдын тоо олширч, сайдуудаасаа эхлээд төрийн алба  улам “олуулаа” улам бүр данхар болсоор байна. Ирэх оны улсын төсөвт гэхэд дарга, сайд нарын гадаад томилолтын зардал 30 гаруй хувиар нэмэгдсэн байна. Мөн нэг  жил зургаан сарын дотор төрийн албан хаагчдын тоог 47 мянгаар нэмж, 187 мянгад хүргэжээ. Ирэх онд энэ тоо 3800 төгрөгөөр нэмэгдэнэ" гэв.