Одоогоос сар орчмын өмнө болсон Тусгаар тогтнолын баярын үеэр МАН-ын шинэхэн дарга М.Энхболд экc дарга Б.Даш-Ёндонг ажлаас нь чөлөөлсөн байна. АН-ын устгасан Тусгаар тогтнолын өдрийг МАН-ынхан тэмдэглээд баяр хөөртөө умбаж явахад өвгөн дарга гундуухан явсан гэж эх сурвалж мэдээллээ. Тэрээр МАН-ын даргын зөвлөхөөр ажиллаж ирсэн юм. Н.Багабандийн, C.Баярын, С.Батболдын, Ө.Энхтүвшингийн гэсэн сүүлийн удирдлагуудынхаа зөвлөхөөр ажиллаж байжээ. Харин М.Энхболд түүнтэй ажиллахаас эелдэгээр татгалзжээ. Б.Даш-Ёндон ч бас М.Энхболдын бодлогыг дэмжиж ажиллаж чадахгүй гэдгээ илэрхийлж байсан гэж эх сурвалж мэдээлэв.

    Ингэснээр М.Энхболд өмнөх бүх удирдлагаасаа өрх тусгаарлав. Учир нь тэрээр хамгийн сүүлд болж өнгөрсөн МАН-ын Их хурлын үеэр Н.Багабандийн, С.Баярын, С.Батболдын, Ө.Энхтүвшингийн багт ажиллаж байсан бүх хүмүүсийг Бага хуралд оруулаагүй гэж яригддаг. Дараа нь МАН-ын дарга асан Г.Очирбатыг Бага хурлаасаа хассан юм. Үр дүнд нь МАН-ын үе үеийн удирдлага болох Г.Очирбат, Б.Даш-Ёндон, Н.Багабанди, С.Баяр, С.Батболд, Ө.Энхтүвшин гэсэн зургаан дарга нэг блок болжээ. Тэднийг С.Баяр ч биш, Сү.Батболд ч биш Н.Багабанди нэгтгэж нягтруулж байгаа гэж эх сурвалж мэдээллээ.

    Энэ байдлаас болон М.Энхболдын зарим бодлого МАН дотроо унаж эхэлжээ. Хамгийн сүүлд л гэхэд М.Энхболд бүлгийн даргаараа нутгийн дүү болох Су.Батболдыг томилуулахаар зүтгүүлжээ.
    Гэтэл М.Энхболдын өөрийнх нь томилсон Удирдах зөвлөлийн гишүүд Су.Батболдыг дэмжилгүй унагачихсан байна. Нөхцөл байдал ингэж өөрчлөгдөнгүүт нь М.Энхболд МАН-ын бүлгийн даргад Ж.Энхбаярыг дэмжихээр болжээ. Харин МАН-ын бүлгийн гишүүд М.Энхболдын санал болгосон Ж.Энхбаярыг биш С.Бямбацогтыг дэмжсэн байна.
    Ийнхүү М.Энхболд намынхаа бүх удирдлагыг үгүйсгэж байгаа нь ихээхэн эргэлзээ дагуулах болов. Тийм ч учраас МАН-ын бүлгийн даргаар өөрийн хүн болох Су.Батболдыг томилох гэсэн бодлого нь бүтэлгүйтсэн гэж ажиглагчид дүгнэж эхлэв.