Төрийн байгуулалтын байнгын хорооны өнөөдрийн хуралдаанаар Монгол Улсын Ерөнхийлөгчөөс өргөн мэдүүлсэн Монгол Улсын Засгийн газрын тухай хуульд өөрчлөлт оруулах тухай, Монгол Улсын Их Хурлын тухай хуульд өөрчлөлт оруулах тухай хуулийн төслүүдийн хэлэлцэх эсэх асуудлыг хэлэлцэв. Энэ талаар Ерөнхийлөгчийн хуулийн бодлогын зөвлөх Ч.Өнөрбаяр танилцуулсан юм.Монгол Улсын Ерөнхийлөгч Ц.Элбэгдорж Үндсэн хуульд заасан бүрэн эрхийнхээ хүрээнд Монгол Улсын Засгийн газрын тухай хуулийн 20 дугаар зүйлийн 1 дэх хэсгийг “Засгийн газар Ерөнхий сайд, гишүүдээс бүрдэнэ. Зөвхөн Ерөнхий сайд Улсын Их Хурлын гишүүний ажил, албан тушаалыг хавсарч болно. Энэ тохиолдолд гишүүнийхээ бүрэн эрхийг хэвээр халдгална” гэж өөрчлөн найруулах, үүнтэй уялдуулан Монгол Улсын Их Хурлын тухай хуулийн зарим зүйлийн зохих заалтыг өөрчлөн найруулах хуулийн төслүүдийг санаачлан боловсруулж өргөн мэдүүлсэн юм. Байнгын хорооны гишүүд төсөл санаачлагчийн танилцуулгатай холбогдуулан асуулт асууж, саналаа хэлсний дараа санал хураалт явуулахад хуралдаанд оролцсон гишүүдийн олонх нь уг хуулийн төслүүдийг хэлэлцэхийг дэмжсэн тул энэ тухай санал, дүгнэлтээ чуулганы нэгдсэн хуралдаанд оруулж хэлэлцүүлэхээр болов.
Мөн байнгын хорооны энэ өдрийн хуралдаанаар “Том төрөөс ухаалаг төр рүү” шилжих шилжилтийн үйл явцыг эрчимжүүлэх чиглэлээр тодорхой бодлого, арга хэмжээнүүдийн төсөл боловсруулах үүрэг бүхий Байнгын хорооны ажлын хэсэг байгуулах тухай хэлэлцсэн юм. Монгол Улсын Ерөнхийлөгч Ц.Элбэгдоржийн санаачилсан “Ухаалаг төр рүү” шилжих үйл явцыг тус байнгын хорооны эрхлэх асуудлын хүрээнд манлайлан дэмжиж, Засгийн газраас хэрэгжүүлж буй “Хүнд суртлыг устгах” төслийн багийн үйл ажиллагааг эрчимжүүлэх чиглэлээр тодорхой бодлого, арга хэмжээний төсөл боловсруулж байнгын хорооны 2014 оны жилийн ажлын төлөвлөгөөнд тусган хэрэгжилтийг зохион байгуулах үүрэг бүхий ажлын хэсгийг гишүүн С.Дэмбэрэлээр ахлуулан гишүүн А.Бакей, М.Батчимэг, Су.Батболд, Д.Батцогт, Ж.Батзандан, Р.Бурмаа, Б.Наранхүү нарын бүрэлдэхүүнтэй байгуулахаар байнгын хорооны хуралдаанаас тогтлоо гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
