Сүүлийн үед УИХ-ын гишүүд ажлаа тасалж чуулган болон байнгын хорооны хуралдаанд суухаа больсон. Тэгвэл тэднийг хуралд суулгахын тулд УИХ-ын нэр бүхий гишүүд хурууны хээгээр нь ирц бүртгэх саналыг гаргасан билээ. Үүнийг нь өнөөдөр Төрийн байгуулалтын байнгын хороогоор дэмжиж чуулганаар хэлэлцүүлэхээр болов. Өмнө нь ихэнхи гишүүд картаа уншуулчихаад өрөөндөө очоод суучихдаг тэгээд өмнөөс нь нэг нь кноп дардаг байсан. Тэгвэл одоо шинээр батлагдаж буй хуульд гишүүдийн ирцийг хурууны хээгээр бүртгэх юм. Ингэхдээ гишүүд УИХ-ын дарга З.Энхболдоос картаа авч, ирцээ бүртгүүлээд тэр дарааллаараа үг хэлж, асуулт асуудаг болно. Тэгэхээр гишүүдийн үг хэлж, санал бодлоо илэрхийлэх эсэх нь чуулганы хуралдаанд цагтаа ирэхээс эхлээд олон зүйлээс шалтгаалдаг болж байна. Мөн гишүүд хурлаа тасалвал цалингаас нь хасах заалтыг шинэ хуульд тусгажээ. Гэхдээ ард түмнийг парламентад төлөөлөн сууж байж хурууны хээгээр ирцээ бүртгүүлэх хэмжээнд тулсан нь өнөөгийн УИХ-ын гишүүдийн "арчаагүй" дүр төрх гэж шүүмжлэх хүмүүс байгаа юм.