Уржигдар УИХ-ын гишүүн О.Баасанхүү Засгийн газрын хоёр сайдыг огцруулахаа тунхаглаж “Сүүлийн нэг жилд ард түмний амьдрал доройтож, эдийн засаг, төсөв хүндэрч байгаа учраас салбар хариуцсан хоёр сайд нь хариуцлага хүлээх ёстой. Тиймээс би огцруулах кноп дарна. Монголын ард түмэн тэдний муу ажиллаж байгааг харж байхад улайм, цайм хоёр сайдыг авч үлдэх нь буруу үйлдэл. Энэ бол ёс зүйд таарахгүй” хэмээн мэдэгдэж байсан юм. Харин тэрээр өчигдөр “МАН-ынхан Засгийн газарт орохын тулд ийм жүжиг тавьж байна. МАН-ын үр могойнууд та бүхэн бол бондын мөнгөнөөс идэлцмээр байдаг. Олдохгүй болохоор Засгийн газарт хамтарч ажиллах далд санаа агуулж байна” хэмээн ганцхан хоногийн дотор хүн танихын аргагүй хувирч байна. О.Баасанхүү шиг ингэж газар дээрээ 180 градус хувирч байгаа олон гишүүн бий гэж саарал ордны эх сурвалж мэдээлэв. Учир нь Ч.Улаан, Н.Батбаярыг огцруулах гэсэн сөрөг хүчний санаачилга олон гишүүдийг “шатрын нүүдэл” хийхэд хүргэжээ.

    Уг нь МАН-ынхан нилээд тооцоолж байж хоёр сайдыг огцруулах асуудлыг өргөн барьсан байна. Зүгээр ч нэг огцруулья, сөрөг хүчний үүргээ гүйцэтгэе гэж асуудалд хандаагүй аж. Өөрөөр хэлбэл “Шударга ёс” эвсэлийн зарим гишүүдээс гадна бие даагчид ч МАН-ын бодлогыг дэмжинэ гэж урьдчилан тохирчээ. Мөн АН-ын зарим гишүүд ч Ч.Улаан, Н.Батбаяр хоёрыг огцруулах асуудлаар МАН-ынхантай хуйвалдсан байна. ИЗНН-ын С.Дэмбэрэл хүртэл хоёр сайдыг огцруулах байр суурийг дэмжсэн байж. Ингээд МАН-ынхан барьцаа хангалаа гэж үзээд Ч.Улаан, Н.Батбаяр хоёрыг огцруулах асуудлыг өргөн барьжээ. Гэтэл МАН-ынхныг дэмжинэ хэмээн мэдэгдэж байсан эрхэм гишүүд ганцхан өдрийн дотор байр сууриа өөрчилж өмнөх тохирооноосоо өөр зүйлсийг ярих болов. Эх сурвалжийн мэдээлж байгаагаар бол УИХ-ын зарим гишүүд эрх баригчидтайгаа тохироо хийж эхэлсэн байна. Зарим нь байнгын хорооны дарга болохоор, нөгөө хэсэг нь ах дүү хамаатан саднаа ажилд томилуулахаар, үлдсэн нь тойрогтоо хөрөнгө оруулалтын асуудал шийдвэрлүүлэхээр гэх мэтээр элдэв янзын хувийн шинжтэй хэлэлцээрүүд хийгээд МАН-ынханыг муриж эхэлжээ. Ингэснээр эрх баригчид УИХ-ын хувийн тоглолттой гишүүдийн өмнө нилээд өр тавьж танхимын хоёр сайдыгаа хамгаалж үлдэх нь тодорхой болов.

    Өөрөөр хэлбэл “чоно борооноор” гэдэг шиг сөрөг хүчний санаачилга дээр тулгуурлан олон гишүүд эрх баригчидаар асуудлуудаа шийдүүлж хоёр сайдыг хамгаалахаар болсон сурагтай. Ингэснээр санаачилга гаргасан цөөнх, хүчин мөхөсдөж санасандаа хүрч чадахааргүй боллоо. Тэгсэн ч гэсэн МАН-ын бүлгийн шинэхэн дарга С.Бямбацогт УИХ-ыг хөдөлгөөнд оруулаад байх элдэв санаачилгуудыг өрнүүлээд байхаар ажиглагдаж байна. Тэгээд ч тэрээр өчигдөр АН-ынхны асуултанд торолгүй хариулж МАН-ын залуус ачааны хүндээс айхгүйгээс гадна асуудал бэрхшээлийг эвтэйхэн тайлбарладагийг ойлгуулав. 

    Ийнхүү МАН-ынхан эдийн засгийг хүндрүүлсэн гол буруутан болох хоёр сайдыг огцруулах зорилгоо хэрэгжүүлж чадахгүй ч эрх баригчдыг өөрсдийнх нь өмнө “өрөнд” оруулж, УИХ-ын зарим барьцгүй гишүүдэд шинэ боломжийг нээж өгснөөр энэ удаагийн ажиллагаа өндөрлөх нь тодорхой болов.